Сыл аайы сытыйар Саллаат күөлэ

“Күөлбүт эмиэ сытыйан эрэр, ким дьаһайыахтааҕый?”  - диэн сыллата ыйыталлар.

Бу күөл “Солдатское озеро” диэн ааттааҕын, арааһа, үгүспүт билбэт буолуохтаах.

Күөл Губинскай уокурук территориятыгар киирэр. Солдатскай күөл кытылын бөҕүн-сыыһын муниципальнай дворниктар кэмиттэн кэмигэр ыраастыыллар, ону тэҥэ хомус отун охсоллор. Оттон уу тулатын “Якутдорстрой” ыраастыахтаах.

Санатан эттэххэ, 2000 сыллаахтан куорат ханаалын Сайсары күөлүттэн саҕалаан Кальвица уулуссатыгар диэри трассата Губин уулуссатын устун уҥа диэки устара, салҕыы Чиряев уул. уонна Хабаров уул. тахсара, устунан боротуокаҕа түһэрэ. Номнуо баар 202-с уонна оччолорго саҥа тутуллуохтаах 203-с микрооройуоннар икки ардыларынан устуохтааҕа.

2003-2008 сылларга ыытыллыбыт корректировка түмүгэр куорат ханаалын уута Кальвицаттан куорат боротуокатыгар диэри Сэбиэскэй Аармыйа 50 сыла уулуссаҕа баар шлюзтарынан түһэр буолбута.  Куорат ханаалын түмүктүүр кэрчигин хайысхата Хомустаах күөл нөҥүө барар гына уларытыллыбыта. Билигин оннук бэйэтин дьаалытынан бытааннык да буоллар уста сатыыр.

Сайсары күөлтэн Кальвицаҕа диэри  ханаал устата – 5300 м.

Сайсары күөл диэкинэн дириҥэ – 95 м.

Кальвицаҕа баар ханаал дириҥэ – 92 м.

Дириҥнэр араастаһыылара – 3 м.

Кальвицаттан Сэбиэскэй Аармыйа 50 сыла уулуссаҕа диэри устата – 5345 м.

Дириҥэтии үлэтэ Петровскай уонна Каландаришвили уулуссаларга баар муосталарынан оҥоһуллубута ыраатта.

Солдатскай күөл уута хамсаабакка турар буолан сытыйар. Ааҕааччыларбытыгар судургутук быһааран биэрдэххэ, ”Якутдорстрой"  тула өттүн көрүүнү-истиини оҥорор эбээһинэһин толорор - хомуһун охсор, кытыл бөҕүн хомуйар, ууга уста сылдьар бөҕү ыраастыыр. Оттон бүрүллэр чалахайын ыраастыыр үлэ диэн суох, онно анаан туспа харчы көрүллүбэт.