“Сыахай түһүлгэтэ” быыстапкаҕа ыҥыраллар

Саха сиригэр Норуот маастарын күнүн көрсө кулун тутар 3 күнүгэр 17 чаастан СӨ Национальнай бибилэтиэкэтин Историческай дьиэтин ааҕар саалатыгар “Сыахай түһүлгэтэ” быыстапка аһыллыытыгар ыҥыраллар.

Бу күн СӨ уус-уран оҥоһуктарын маастара, СӨ үөрэҕириитин туйгуна, Саха сирин сыахай оҥорооччуларын сойууһун бэрэссэдээтэлэ Айталина Иванова “Саһыл тумса” уонна “Якутская керамика” үлэлэрэ; Мэҥэ Хаҥалас улууһуттан СӨ уус-уран оҥоһуктарын маастара, Арассыыйа худуоһунньуктарын сойууһун чилиэнэ Агафья Колесова "Детские забавы", “Флора", “Аан Алахчын хотун” оҥоһуктара; СӨ уус-уран оҥоһуктарын маастара, Арассыыйа худуоһунньуктарын сойууһун чилиэнэ, СӨ үөрэҕириитин туйгуна Дария Ноговицына “Под северным сиянием”, “Сайылыкка киирии” оҥоһуктара туруохтара. Маны таһынан, Чурапчы улууһуттан СӨ уус-уран оҥоһуктарын маастара, Чурапчы улууһун уонна Төлөй нэһилиэгин норуодунай маастара Изабелла Кузьмина “Симэхсин эмээхсин” диэн үлэтин, Хаҥалас улууһуттан СӨ уус-уран оҥоһуктарын маастара, Хаҥалас улууһун норуотун маастара, СӨ култууратын туйгуна Татьяна Лыткина “Дьөһөгөй Айыы” үлэтин көрүөххүт.
С.А. Зверев – Кыыл Уола "Кулун кугас аттаах Куллустай Бэргэн" олоҥхотун дьоруойдарынан дьүһүйүүнү Сунтаар улууһуттан "Иккис тыын" сыахай оҥорооччуларын түмсүүтэ быыстапканы ситэриэ. 
Көҕүлээччи - Мария Тараярова, куратор - Маргарита Алексеева, салайааччы - Сандаара Кубаҕай Күн. 

Быыстапканы кулун тутар 31 күнүгэр диэри көрүөххэ сөп.