СВО кыттыылаахтарын төрөппүттэрэ санаторийга сынньаналлар

Саха сиригэр анал байыаннай дьайыы кыттыылаахтарын тыһыынча кэриҥэ төрөппүтэ доруобуйатын босхо көннөрүннэ. Өрөспүүбүлүкэ бырабыыталыстыбатын бэрэссэдээтэлин солбуйааччы Георгий Степанов иһитиннэрбитинэн, номнуо 991 киһи санаторийга эмтэммит.

Байыаннай сулууспалаахтар аймахтара Москва уобалаһыгар баар «Бэс Чагда» санаторийга сынньаналлар. СВО кыттыылаахтара уонна кинилэр чугас дьонноро онно социальнай уонна мэдиссиинэ чөлүгэр түһэриилэринэн 5481 өҥөнөн туһаннылар. Ону таһынан, 250 дьиэ кэргэҥҥэ чааһынай дьиэлэрин гаастааһыҥҥа харчынан көмө оҥоһулунна, оттон 707 киһиэхэ бааһырбыт байыастар эмтэнэр сирдэригэр айаннарын төлөбүрэ төлөннө.

Босхо эмтэнии эрэ буолбакка, атын да көмө оҥоһуллар. Ол курдук, 44 киһиэхэ – СВО кыттыылаахтарын кэргэттэригэр уонна икки инбэлиит байыаска – суоппар быраабын ыларга үөрэммиттэрин иһин компенсация төлөннө. Социальнай үлэһиттэр дьиэлэригэр көмөҕө наадыйар 788 киһини көрдүлэр-иһиттилэр.

Туспа болҕомто үлэнэн хааччыйыыга уурулунна. Дьарыктаах буолуу кииннэригэр 1444 киһи сырытта: 682 СВО кыттыылааҕа уонна 762 кинилэр дьиэ кэргэттэрин чилиэннэрэ. Кинилэртэн 271 киһини идэҕэ үөрэтиигэ ыыттылар, оттон 883 киһи номнуо үлэ булла.