СВО кыттыылаахтарын дьиэ кэргэттэрин өйүүргэ грант үбэ кэлиэ

2026–2027 сылларга «Анал байыаннай дьайыы кыттыылаахтарын оҕолорун уонна дьиэ кэргэттэрин өйүүр эрэгийиэннээҕи тиһиги сайыннарыы» диэн кэлим миэрэлэри өйүүргэ көрүллэр дойду таһымнаах грант куонкуруһа соторутааҕыта түмүктэммит. Ыарахан балаһыанньаҕа түбэспит оҕолорго көмөлөһөр  пуонда «Моя семья» бырагырааматын чэрчитинэн ыытыллыбыт.

Куонкурус хамыыһыйата 21 эрэгийиэн кэлим миэрэлэрин талан, кыайыылааҕынан быһаарбыт. Ол туһунан дойду Үлэҕэ уонна социальнай сайдыыга министиэристибэтэ иһитиннэрэр.

Саха сирин аатыттан Үлэ уонна социальнай сайдыы министиэристибэтэ инновациялаах социальнай бырайыактары киллэрбитэ кыайыылаахтар ахсааннарыгар киирбит. Онон 2026–2027 сылларга Анал байыаннай дьайыы кыттыылаахтарын оҕолоругар көмөлөһөргө Арассыыйаттан 13 мөлүйүөн солкуобай ананар буолбут.

Грант үбэ маннык хайысхаларга туттуллар эбит:

* Оҕолор, төрөппүттэр уйулҕа уонна эмоция өттүнэн туруктарын көннөрөр социальнай өҥөлөрү киллэриигэ.

* Дьиэ кэргэттэргэ көмөлөһөр мобильнай сулууспалары сайыннарыыга.

* Ыраахтан өйөбүлү оҥорор сыыппара (цифровой) өҥөтүн тэрийиигэ.

* Анал байыаннай дьайыыга кыттыбыт аҕалар уонна оҕолор икки ардыларыгар сыһыаны бөҕөргөтөр сыаллаах «Аҕабыныын бииргэ» бырагырааманы үлэлэтиигэ.

* Дьиэ кэргэн ыкса сыһыанын чөлүгэр түһэрэр уонна бөҕөргөтөр «Дьиэ кэргэн реабилитацията» бырагырааманы үлэлэтэргэ.

Бу өйөбүл кэлим миэрэлэрин олоххо киллэрэргэ 200-тэн тахса тэрилтэ, араас хабааннаах биэдэмистибэлэр уонна уорганнар кыттыахтара. Ол иһигэр 20 социальнай тэрилтэ, социальнай хайысхалаах уонтан тахса НКО  баар. Кэлим өйөбүлү уопсайа 1,5 тыһыынчаттан тахса СВО кыттыылааҕын дьиэ кэргэнэ туһаныа диэн суоттаналлар.

Гранынан өйөбүл көмөҕө наадыйар хас биирдии дьиэ кэргэн сөптөөх көмөнөн хааччылларыгар көмөлөһүө. Ол көмө уйулҕаны чөлүгэр түһэрииттэн саҕалаан дьиэ кэргэн сыһыанын бөҕөргөтүүгэ тиийэ киэҥ хабааннаах буолуоҕа.