СВО кыттыылаахтарыгар Тулагыга уонна Табаҕаҕа сир учаастактарын түҥэтии салҕанар

Баайга-дуолга уонна сир сыһыаннаһыыларыгар департамент атырдьах ыйын 27 күнүгэр анал байыаннай дьайыы кыттыылаахтарыгар Табаҕаҕа 32 уонна Тулагы Киллэмҥэ 58 сир учаастагын түҥэттэ. 

Учаастагы талар сэрэбиэйгэ 100 киһи ыҥырыллыбытыттан 88 кэлбит.
2025 сылга Дьокуускай куораттан анал байыаннай дьайыы кыттыылаахтарыгар уопсайа 618 сир учаастага ананна: Табаҕаҕа – 244, Тулагыга – 374, диэн Олохтоох дьаһалта пресс-сулууспата иһитиннэрэр. 

Бэлиэтээн эттэххэ, анал байыаннай дьайыы кыттыылаахтарыгар босхо сир учаастагын талларыы Дьокуускай куорат Олохтоох дьаһалтатын 19.12.2024 с. 2518р №-дээх «Об утверждении Порядка организации и проведения выбора земельных участков лицам, принимавшим участие в специальной военной операции на территориях Украины, Донецкой Народной Республики и Луганской Народной Республики с 24 февраля 2022 года, на территориях Запорожской области и Херсонской области с 30 сентября 2022 года» дьаһалыгар олоҕурар.