Суукканы эргиччи ууну-хаары кытта өрө мөхсөллөр

Бу дьыл муус устарыгар өтөрүнэн биллибэтэх, кырата, кэнники 5 сылга буолбатах «инчэҕэй» ый буолара сабаҕаланар. «Бу кэмҥэ түһүөхтээх орто сөҥүү кээмэйиттэн үс бүк элбэх уу» дииллэр. Синоптиктар официальнай иһитиннэриилэригэр олоҕурар буоллахха, муус устар 20 күнүгэр диэри 23 мм сөҥүү түспүт. Тэҥнииргэ эттэххэ, орто көрдөрүү баара эрэ 8 мм буолуохтааҕа. Ый бүтүөр диэри өссө элбиир чинчилээх. Икки сыллааҕыта, 2023 с. муус устарыгар, 20 мм буола сылдьыбыта.

Уу-хаар таһыччы элбэҕин бу да иһитиннэриитэ суох куорат олохтоохторо эппитинэн-хааммытынан балачча биллибит. Ол биһиги диэн, Дьокуускай куорат туһааннаах сулууспаларын үлэһиттэрэ күнүстэри-түүннэри сааскы чалбаҕы кытта тохтоло суох өрө мөхсөргө күһэллэллэр. Ол үрдүнэн килэйбит-халайбыт уу көҕүрээн биэрэр чинчитэ улаханнык көстүбэт. Ыраастаатахтарын аайы халлааммыт, саатар, кыһайбыт курдук, хаардыыр икки самыырдыыр.

Сааскы уу сүүрүгүрүөхтээх халдьаларын (лотоктарын) ыраастыы, оборторо сылдьаллар. Бу үлэҕэ сүрүн эппиэттээх – «Якутдорстрой» АУо. Куорат иһигэр уопсайа 57 км уһуннаах лоток баарыттан, 22-с чыыһыла туругунан, 38 км паарынан ириэриллибит, ыраастаммыт.

Ону тэҥинэн уотунан барар носуостары үлэлэтэн саҕалаабыттар. 50 носуостан аҥаара ууну хачайдыырга тигинэччи үлэлиир. Уулуссаларга, тиэргэннэргэ мунньуллубут ууну оботторуу тиһиктээхтик барар. Ону куорат хомунаалынай сулууспалара, онно үлэлэһэр тэрилтэлэр, уокуруктар уонна кинилэр бэдэрээттээх тэрилтэлэрэ суукканы эргиччи үлэлээн ситиһэллэр.

Куорат дьаһалтатыгар сааскы хаар уутун суох оҥорууга, оботторууга сыһыаннаах мунньахтар күн аайы ыытыллаллар. Туһааннаах тэрилтэлэр ыыппыт үлэлэрин отчуоттаталлар. Холобур, оптуорунньук күн Дьокуускай куоракка сааскы санитарнай ыраастааһыны ыытыыга үлэлэһэр штаб мунньаҕар куорат мээрин солбуйааччы Владислав Слепцов территориятааҕы уорганнарга ууну-хаары оботторуу үлэтин күүһүрдэллэригэр соруйбута. Онуоха туох хайа иннинэ толору хааччыллыыта суох уонна хаарбах туруктаах олорор дьиэ пуондатын сиригэр-уотугар, социальнай тэрилтэлэр тиэргэннэрин ууттан ыраастыырга дьоһуннаах болҕомто ууруллуохтааҕын тоһоҕолоон бэлиэтээтэ. Автодорожнай, Строительнай, Промышленнай уокуруктарга уонна Марха түөлбэтигэр эбии АСМ авто-тиэхиньикэлэрин көмөҕө ыытарга быһаардылар.

«Жилкомсервис» МУП налыы сирдэртэн ууну оботторуу тэтимнээхтик барарын отчуоттаата. Ый саҕаланыаҕыттан уопсайа 17 386 куб. м хачайдаабыт. Сыччах кэнники суукка иһигэр –1934 куб. м элбэх, оптуорунньук сарсыардатыгар – өссө  186 куб. м уу ыраастаммыта этилиннэ. Бу тэрилтэ ити курдук ууну ылыллыбыт былаан быһыытынан оботторорун сэргэ куорат олохтоохторуттан киирэр сайабылыанньаларынан эмиэ дьарыктанар.

Болҕой: Сааскы ууттан кыһалҕаламмыт дьон Кэлим дьуһуурунай-диспетчер сулууспатын (ЕДДС) 8-4112- 44-45-64 нүөмэригэр эрийэн, сайаапкалаһар кыахтааххытын санатабыт.

Сууккаҕа, бу нүөмэргэ, ортотунан ыллахха, 72-75 сайаапка киирэ турар. Муус устар 20 күнүнээҕи туругунан салайыы территориятааҕы уорганнарын күүһүнэн (ТОУ) 5 290 куб. м уу оботторуллубут. Оттон муус устар 6 күнүттэн саҕалаан, холбоон  – 15 310 куб.м.

Маны таһынан Дьокуускай куорат үөрэххэ управлениетын 10 биэдэмэстибэннэй эбийиэгэ 370 куб. м ууну хачайдаабыттар. Онон уопсайа 32 тыһ. куб м. ууттан ыраастаммыттар.