Суотабай төлөпүөн саҥа сыһыарыытын туһаныахха сөп

Ыйааһына кыра – 3,9 МБ эрэ, онон төлөпүөн өйүн ылыа диэн сэрэхэдийэр төрүөт суох. Бу сыһыарыыны СӨ ДьУоХХ уонна энергияны көдьүүстээхтик туһаныы киинэ оҥорторбут. Айфоннаахтар – App Store-тан, оттон андроидтаахтар Google Play-тан холкутук хачайдаан ылыахтарын сөп эбит. Сыһыарыы үчүгэйэ – дьиэ-уот хомунаалынай өҥөтүн иһин төлөбүрү уонна хапытаалынай өрөмүөн усунуоһун төлөһөр туһугар туһааннаах тэрилтэлэр офистарыгар тиийэ уонна саайтарыгар эр-биир киирэ сатыыр кыһалҕа суох буолар. Барытын ОПД сыһыарыытыгар төлөһүөххэ сөп. Туһааннаах киин иһитиннэрбитинэн, ити сыһыарыыттан ДьУоХ өҥөтүн иһин төлөһөр докумуоннары ылыахха сөп. Учуоттуур прибор көрдөрүүтүн ыытар уонна төлөбүр төһө сөпкө ааҕыллыбытын хонтуруоллуур кыах эмиэ бэриллибит. Ону тэҥэ чэпчэтиини, субсидияны ылыыны судургутутуоҕун уонна ыйытыылаах түгэҥҥэ онлайн-эрэсиимҥэ быһааттарыахха сөбүн АГИП пресс-сулууспата иһитиннэрэр. Туһааннаах сыһыарыыны бу куар-коду туһанан, эрэйэ суох булар, хачайданар кыахтааххыт.