Суолунан айан куттал суох буоларын туһугар

«Главстрой» МКУ иһитиннэрбитинэн, Ойуунускай аатынан уулусса Дежнёв уулуссатыттан Октябрьскай уулуссатыгар диэри, Октябрьскай уулуссаттан Каландаришвили уулуссатыгар диэри кэрчигэр күөх үүнээйилэри кэрдиэхтэрэ. Ирдэнэр докумуон, көҥүл бэриллибит.

Оттон Дежнёв уулуссатыттан Каландаришвили аатынан уулуссаҕа диэри учаастакка суол бэлиэлэрин, светофору уонна сыста сытар территорияларга туору сири мэһэйдииллэрин  иһин,  күөх үүнээйилэр  үөһэ өттүлэрин  кырыйыахтара.  

Маннык дьаһал, үөһэ этиллибитин курдук, суолунан айан куттала суох буолуутун хааччыйарга, суол тэриллэрэ ыраахтан көстөр буолалларын туһугар  ылыллар. Куоракка көҕөрдүү үлэтэ, өрүү буоларын курдук, тиһиктээхтик ыытыллар. Ол курдук, Ойуунускай аатынан уулуссаҕа (Дежнёв уулуссатыттан Октябрьскай уулуссатыгар диэри кэрчигэр) хапытаалынай өрөмүөн кэнниттэн территорияны көҕөрдүү үлэтэ барыаҕа. Уулусса кытыытыгар сүрүн тутуу-таҥар үлэ бүттэҕинэ, акациялары олордуохтара.  Куорат күөх үүнээйитин чөлүгэр түһэрии уонна саҥардыллыбыт куорат эйгэтин тас көстүүтүн тупсарыы – болҕомто киинигэр сылдьар.

Үлэ барар кэмигэр үөскүүр быстах кэмнээх табыгаһа суох быһыыны өйдүүргүтүгэр көрдөспүттэр.