Суол алдьаныытын оҥоруу: 15-тэн 12-тин чөлүгэр түһэрдилэр

Бүгүҥҥү туругунан, уу алдьаппыт 12 учаастагын чөлүгэр түһэрбиттэр. Бу туһунан өрөспүүбүлүкэтээҕи суол уонна тырааныспар миниистирин солбуйааччы Владимир Тихонов иһитиннэрдэ.
Оҥоһуллубут учаастактар истэригэр Өлүөхүмэ куоратыгар баар «Умнас» РАД, Горнай Аһыматын аттынааҕы  «Кэбээйи» РАД, Сунтаар улууһугар «Устье –Кэппэндээйи», Эбээн Бытантайга  «Үөһээ Дьааҥы» РАД учаастактара  уо.д.а. бааллар.  

Ханна оҥоһулла илигий? Тоҕо?

Күн бүгүҥҥү туругунан, Томпо улууһун сиригэр-уотугар баар «Алдан» эрэгийиэн таһымнаах массыына суола билигин да сабыылаах. Төрүөтэ уу сол да барбакка сытар. Күннэтэ уу таһымын кэтээн көрөллөр. Түстэ да, өрөмүөн үлэтэ саҕаланыа.

Томпо улууһун сиринэн-уотунан ааһар «Дьааҥы» суолга – «Халыма»  суолтан Тополинайга диэри кэрчиккэ – 47 учаастак алдьаныылаах. Суһаллык оҥоруохтарын уһун ардахтар, тыа уута киириитэ улаханнык мэһэйдиир. Бадараан буола инчэйбит суолга ыарахан уйуктаах суолу оҥорор тиэхиньикэ сылдьар кыаҕа суох.

Суол өрөмүөнүгэр анаан, «ДЭП №135» АУону кытта 40,3 мөл. солк. суумалаах судаарыстыбаннай контракт түһэрсиллэн, балаҕан ыйыттан үлэ саҕаламмыт. Быһа барыллаан, балаҕан ыйын 30 күнүгэр чөлүгэр түһэрии үлэ түмүктэниэхтээх.  

Кэбээйи улууһугар «Сангаар» суол сир бүрүөһүнэ элбэх ууттан сэдиптээн, сиҥнэн турар.  Сырыы хааччахтамматын туһугар бэдэрээттээх тэрилтэ ол алдьаныылаах сири эргийэн ааһар суолу тэлбит. Уу таһыма түһэ турар. Бу алдьаммыт суолу чөлүгэр түһэрэргэ, быһа холуйан, 9,6 мөл. солк. наада.
«Ордук улаханнык Үөһээ Дьааҥы оҕустарда: кинилэр биэс бөһүөлэктэригэр – Үөһээ Дьааҥы куоратын сэргэ Томтор, Сайдыы, Суордаах уонна Боронук бөһүөлэктэрин суола алдьаныылаах. Туһааннаах докумуоннары бэлэмнээн, билигин олор судаарыстыбаннай эспэртиисэҕэ киирэн сыталлар.

Оттон Сунтаар оройуонугар нэһилиэктэр икки ардыларынааҕы суолларын (Сунтаар – Туойдаах, Сардаҥа – Тэҥкэ, Кириэстээх – Хордоҕой) муниципалитеттар күүстэринэн оҥордулар.
Сунтаар иһинээҕи алдьаммыт-кээһэммит суолларга аакта оҥорон, докумуоннарын бэлэмнээн эрдэ ыыппыттара эспэртиисэни толору ааспыт. Инньэ гынан, бэдэрээт тэрилтэлэрин кытта кэпсэтии бара сылдьар эбит.

Уус Майа улууһугар (Эдьээҥҥэ уонна Күпкэ) сааскы халаан алдьатыытын туоратарга  28,8 мөл. солк ирдэнэр.  Суолларын чөлүгэр түһэрэ сылдьаллар. Балаҕан ыйын 27 күнүгэр диэри түмүктүүргэ суоттаналлар.

Уопсайа олохтоох алдьаммыт суоллары оҥорууга 46,1 мөл. солк. үп туттуллар диэн суоттаабыттар.  Кэккэ муниципальнай тэриллиилэр киллэрбит докумуоннарыгар олоҕуран, сыананы эспэртиисэлиир докумуоннар оҥоһуллан бэлэм буолбуттар, сорохторун киэнин салгыы үөрэтэ, ааҕа сылдьаллар.  

Муниципалитеттар олохтоох бэйэлэрин бүддьүөттэрин суотугар бу дьыл алтынньы 15 күнүгэр диэри халаан уута алдьаммыт суолларын чөлүгэр түһэрэллэригэр сорудахтаммыттар. Итиннэ туттубут үптэрэ өрөспүүбүлүкэ хааһынатыттан, анал уурааҕы таһааран туран,  төннөрүллэрин туһунан этиллэр.

.