«Сулустар» уон сыл анараа өттүгэр

Дизайнер, худуоһунньук Кыыдаана Игнатьева 2016 сыллаахха Саха сиригэр бастакы муралы уруһуйдаабыт. Ол саҕана «MyTona» хампаанньаҕа арт-дириэктэринэн үлэлиир эбит. Ити сыл L’one «Якутяночка» ырыатыгар клип устууга кыттыбыт. Кыбартыыра атыыласпыт уонна ону өрөмүөннээбит. Хайа хайыһарыгар (слаломҥа) өрөспүүбүлүкэтээҕи күрэхтэһиигэ 2-с миэстэ буолбут.  

Кыыдаана: «2010-с сылларга бастыҥ сыл этэ»,  – диэн түмүктээбит. 

Мария Столярчик уон сыллааҕыта таһаарбыт постарын үллэстибит. Оччолорго оҕолонон олорор ийэ кондитердаан саҕалаабыт. Ити сыл аан бастаан тымныы кыһынтан сылаас дойдуга барар үгэһин саҕалаабыт. «Ырыы тиэмэтэ ол да саҕана баар этэ», – диэн күлбүт.

Ити сыл Саха сирин биллиилээх блогера Владимир Дормидонтов Дьүрүйээнэлиин «Всемирные игры кочевников-2016» үөрүүлээх сабыллыытыгар ырыа устубуттар. Хаартыскаҕа «Тату» бөлөх продюсера Иван Шаповаловы кытта тураллар.

Блогер Лина Малина ол сыл сири-дойдуну кэрийбит: Пекин (Кытай), Соҕуруу Кэриэйэ (Сеул), Таиланд (Паттайя, Самет, Бангкок). Ону таһынан Саха сирин кэрэ-бэлиэ сирдэригэр эмиэ сылдьыбыт. Бу сыл кини бастакы кыбартыыратын атыыласпыт, тапталын көрсүбүт уонна ыал буолбут.

Блогер Ольга Птицына 2016 сыллаахха Балига, Ольхоҥҥа, Австрияҕа, Чехияҕа, Венгрияҕа баран кэлбит. Бу сыл бастакы кинигэтэ күн сирин көрбүт.

2018 сыл түмүгүнэн Саха сирин кэрэ куота, «2-с Вице Мисс Россия» Наталья Строева уон сыллааҕыта Дьокуускайга олорор, үрдүкү кылааска үөрэнэр, «TayaModels» агентствоҕа дьарыктанар эбит. Доҕотторун кытта көрсүһэр сирэ – Орджоникидзе болуоссата, норуокка биллэринэн, «Оржанка».  

Норуот тапталлаах ырыаһыта Виталий Очиров архыыбыттан кэллиэгэлэрин кытта уон сыллааҕыта түспүт хаартыскаларын таһаарбыт. Онно бааллар: Бүөккэ Бөтүрүөп, Надина Эльпис, Галина Шахурдина, Варя Ларионова, Владимир Татаринов, Айгылаан, Анатолий Горохов, Санита Ай, Эрхаан уо.д.а.

«Уон сыл элэстэнэн ааһа охсубут... Мутугунан быраҕар кылгас үйэбитигэр күн ахсын дьоллоох олоҕу сомсуох», – диэн бар дьону ыҥырбыт.

Ырыаһыт, режиссер, «Сахалыы Виктория» араадьыйа сүрүн эрэдээктэрэ Петр Кулаковскай эмиэ айар доҕотторун кытта түспүт хаартыскаларын таһаарбыт. Бэрт кылгастык: «Эдэрбитиин, ырыгаммытыын», – диэбит.

Тыйаатыр уонна киинэ артыыһа Татьяна Легантьева:

«Отой бу соторутааҕыта курдук этэ дии, 10 сыл ааһа охсубут», – диэн суруйбут.

«Саха» НКИХ ыытааччыта Гея Буртахова ол сыл Геленджиккэ сынньаммыт, «Сулустар аллеяларыгар» хаартыскаҕа түспүт.