Сулустар тугу кэпсииллэр: атырдьах ыйын 31 – балаҕан ыйын 6 күннэрэ

Бараан

Нэдиэлэ саҕаланыыта олус тыҥааһыннаах, онон тулуурдаах буол, быһаччы дьайыылары оҥорума. Ханнык да түгэҥҥэ санааҕын түһэримэ. Чэппиэргэ үлэҕэр үтүө уларыйыылар буолуохтарын сөп. Саҥарыаҥ иннинэ толкуйдаа, аны иирсээн тахсыа диэн сулустар сэрэтэллэр. Өрөбүллэргэ өйдүүн-санаалыын сынньан, күүстэ-сэниэтэ мунньун.

Оҕусчаан

Санаа түһүүтүттэн босхолон. Бу нэдиэлэҕэ идиэйэлэргин тута ылымматаллар даҕаны, хас биирдии көҕүлээбит этииҥ биһирэниэҕэ. Барыта орун-оннугар түһүөҕэ, ол эрээри эн кэтэһэргинээҕэр бытаан соҕустук. Ону түргэтэтэ сатыыр табыллыа суоҕа. Өрөбүллэргэ интэриэһинэй билсиһии күүтэр.

Игирэлэр

Бу күннэргэ элбэҕи эргитэ саныаҥ, саарбахтыаҥ, мунаарыаҥ, ол эрээри салгыы хайдах буоларгын олох бэйэтэ көрдөрүө. Айар-тутар кыаххын арыйарга кыһалын, оччоҕо эйигин үрдүктүк сыаналыахтара. Кыраттан кыыһырбакка, инниҥ диэки дьулус, сотору кэминэн санныгар кынат үүммүт курдук өрө тахсыаҥ.

Араак

Өрө көтөҕүллүүлээх уонна бэрт ситиһиилээх нэдиэлэ үүммүт. Санаабытыҥ сатаныа, талбытыҥ табыллыа, ол аайы эрчимиҥ эбиллэн иһиэҕэ. Бииртэн биир идиэйэ күөдьүйэ туруоҕа. Төһө даҕаны сороҕо эрэ олоххо киирбитин иһин, бу бэйэҥ күүскэр уонна кыаххар эрэли үөскэтиэҕэ. Айаҥҥа, командировкаҕа эбэтэр сынньалаҥҥа сыһыаннаах барыта ситиһиилээхтик ааһыаҕа.

Хахай

Бу нэдиэлэҕэ эйигиттэн быһаарыыны тута ылынар сатабыл ирдэнэр. Салалтаны кытта сыһыаныҥ тыҥааһыннанан ылыан, мөккүөр эбэтэр иирсээн тахсыан сөп. Сулустар сүбэлииллэр: оптуорунньукка уонна чэппиэргэ билбэт дьоҥҥун кытта кэпсэтэргэ сэрэхтээх буол. Бээтинсэҕэ дьыалабыай кэпсэтиилэр үтүө түмүктэри аҕалыахтарын сөп.

Кыыс Куо

Саҥаны билии, үөрэнии кыаххын улаатыннарыа, инникигэ эрэли үөскэтиэ. Санаан да көрдөххө, эйигиттэн ураты уруккуттан иитиэхтии сылдьыбыт санааларгын ким олоххо киллэриэй? Ол эрээри доҕотторо уонна өйөбүлэ суох кыаҕыҥ кыратын өйдөө диэн сулустар сүбэлииллэр.

Ыйааһыннар

Эрчим, күүс-сэниэ баар буоллаҕына, үтүө кэм. Сэрэдэҕэ романтическай көрсүһүү күүтэр. Бээтинсэ нэдиэлэ биир саамай чаҕылхай күнэ буолуоҕа: соһуччу түгэннэри, кистэлэҥ санаалар туолууларын уонна оҕолуу үөрүүнү бэлэхтиэҕэ. Ол туһугар чугас дьонуҥ баҕаларын өтө көрөн, кыах баарынан олоххо киллэрэ сатаа.

Ооҕуй

Бу нэдиэлэҕэ бодоруһар эйгэҕин биллэ кыччаттаххына эрэ тугу эмэ ситиһэр кыахтааххын. Билигин аралдьыйбакка үлэлээбитиҥ, оттон доҕотторго атын кэми анаабытыҥ ордук. Суолталаах дьыаланы хамсатар туһугар аҥаардас аптарытыаккынан эрэ туһанарга күһэллиэҥ. Өрөбүл соһуччу түгэннэринэн уонна саҥа билсиһиилэринэн үөрдүөҕэ.

Охчут

Былааннаабытыҥ уонна эрэммитиҥ барыта туолан иһэр. Бэл, табыллыы эн эрэ диэки мичик гынарын курдук саныаҥ. Сэрэдэҕэ интэриэһинэй иһитиннэриини мүччү тутума. Бээтинсэ айаҥҥа сылдьар дьоҥҥо ситиһиини аҕалыаҕа, онон кэлиини-барыыны бу күҥҥэ былааннаабыт ордук. Өрөбүллэргэ доҕотторгор ыалдьыттыы бар.

Чубуку

Үлэни уларытарга уонна карьераҕа үтүө кэм кэлбит. Дьыала-куолу судургутук салаллыа, онуоха энергияҕын тоҕоостоох хайысхаҕа туһаай. Бу кэмҥэ үлэҕэ үрдүүр, байар дөбөҥ буолуоҕа, онуоха көмөлөһөр, тирэх оҥостор дьоҥҥун көрсүөххүн сөп.

Күрүлгэн

Нэдиэлэ бастакы аҥаарыгар саҥаны билэргэ, ыраах сылдьар дьону кытта алтыһарга тоҕоостоох, ол оннугар аттыгар баар чугас дьоҥҥун кытта өйдөспөт буолуу тахсыан сөп. Нэдиэлэ ортото настарыанньаҥ уларыйыан, сыалыҥ-соругуҥ чопчуланыан сөп. Соҕотох буола түһүөххүн баҕарыаҥ. Өрөбүлгэ күнү быһа кыйаханыы уонна бэйэттэн астыммат буолуу баһыйыан сөп, онон кэҥээ, холкутук сырыт, мөккүөргэ кыттыһыма.

Балыктар

Бу нэдиэлэ элбэх хайысхаҕа кэскиллээх уонна улахан барыстаах хантараагы түһэрсэргэ табыгастаах. Онуоха ырааҕы көрөр ыллыктаах өй, бэйэ күүһүгэр эрэл, итиэннэ дьону итэҕэтэр дьоҕур туһалыан сөп. Тус олоххор дьоһун хардыыны оҥорор, быһаарыныы ылынар кэм кэлбит.