СУЛУСТАР: Лермонтов уулуссатыгар Ирина Елизарова аатынан сквер тутуллан эрэр
Сквер бырайыага олохтоох көҕүлээһиннэри өйүүр бырагыраама күрэҕэр икки сыл субуруччу кыттан, былырыын, 2025 сылга, кыайыылаахтар испииһэктэригэр киирбитэ.
Ол курдук, 2 621 958 солк. сыаналаах муниципальнай хантараак 2026 сыл от ыйын 31 күнүгэр баттаммыта; ол иһигэр: 638 тыһ. солк. Ирина Елизарова биир дойдулаахтара, сүгүрүйээччилэрэ, доҕотторо, аймахтара бэйэлэрэ түмпүттэрэ, 250 тыһ. солк. – Дьокуускай куорат бүддьүөтэ, 1 526 тыһ.солк. – үп министиэристибэтэ. Бэлиэтээн эттэххэ, Ирина доҕотторо бу сууманы Дьокуускайга Өксөкүлээх Өлөксөй аатынан Норуоттар доҕордоһууларын дьиэтигэр, дойдутугар Томпо Хаандыгатыгар уонна төрөөбүт Кэскилигэр аһымал кэнсиэртэринэн хомуйбуттара.
Тутуу болдьоҕо – 2026 сыл алтынньы 31 күнэ
Аадырыһа – Строительнай уокурук
Бэдэрээччит – ИП Макаров А.П.
Хаартыскаҕа: Строительнай уокурук салайааччыта Станислав Федоров, Ирина Елизарова чугас дьүөгэтэ Марианна Наумова, уокурук управатын салайааччытын солбуйааччы Елена Саввинова.
«Киин куорат» Ирина Елизарова сырдык аатын үйэтитиини көҕүлээбит бөлөх көхтөөх бэрэстэбиитэлэ Марианна Наумованы кытта кэпсэттэ.
– Сквербит Ира саамай сөбүлүүр дьылын кэмигэр – көмүс күһүн олоххо киирээри турарыттан олус долгуйабыт да, үөрэбит да.
– Марианна, маҥнайгы бырайыагынан манна Ирина Елизарова пааматынньыга туруохтаах этэ...
– Оннук. Пааматынньык – баҕа санаабыт этэ, онтубут бырайыакка киирбэтэ. Кэнэҕэһин Ирина олоҕун, айар үлэтин сырдатар истиэндэ боппуруоһун толкуйдуубут. Онон ыра санаа оҥостубут, ылсыбыт дьыалабыт олоххо киирэн эрэриттэн үөрэбит.
2022 сыл кулун тутар 8 күнэ биһиэхэ ыар сүтүк күнэ этэ, ыраас халлааҥҥа этиҥ эппитинии аймаабыта: ыарахан ыарыы дьүөгэбит Ирина Елизарова сырдык тыынын ылан барбыта.
Чугас киhиҥ, дьүөгэҥ, доҕоруҥ суох буоллаҕына, биллэн турар, бастакынан үйэтитии туhунан санаалар киирэллэр эбит. Кини биллэр, бэйэтэ ааттаах-суоллаах, историялаах, сүгүрүйээччилэрдээх, истээччилэрдээх буоллаҕына, атыннык толкуйдуу да барбаккын.
Туох барыта кыраттан саҕаланар, ылсыахха, дьулуһуохха, бастакы хардыыны оҥоруохха эрэ наада эбит. Ыар сүтүктэммит күммүттэн саҕалаан тугу эрэ гыннахпына сатанар диэн санаа үүйэ-хаайа туппутугар, доҕотторбут көмөлөрүнэн Ирабыт төрөөбүт-үөскээбит дойдутун Томпо Кэскил бөһүөлэгин библиотекатыгар оҕо уонна улахан киһи кинигэлэрин, оскуола саастаах оҕолорго аныгы мас оонньуулары бэлэхтээбиппит. Хас биирдии оонньуу, кинигэ Ирабыт туһунан истиҥ тыллардаах уонна доҕотторун, сүгүрүйээччилэрин ааттарыттан диэн анал суруктаах гына бэлэмнээбиппит. Биир дойдулаахтара, чуолаан үүнэр көлүөнэ, дойдутун ыччата Ирабыт туһунан билиэх тустаах диэн толкуйтан. Ити биһиги бастакы хардыыбыт этэ.
Ол кэннэ 2023 сыллаахха Галина Нельбисова "Ирина Елизарова. Ураты" кинигэтэ тахсарыгар улахан үлэ барбыта.
2022 сыл муус устар ыйыттан Ирина Елизарова курдук үйэҕэ биирдэ кэлэн ааһар чаҕылхай сулус курдук ырыаһыкка пааматынньык туруорар туһунан толкуйдааммын, Сергей Лукин диэн өрөспүүбүлүкэҕэ киэҥник биллэр скульпторга, архитекторга санаабытын этэн, сакаас оҥорбуппут. Хомойуох иһин, ол баҕа санаабыт туолбата эрээри, үлэбитин салгыыбыт.
Ирина Елизароваҕа аатынан "Сулустар" сквер кини дьон-норуот билиниитин ылбыт, эдэр сааһын чаҕылхай, дьоллоох кэмнэрэ ааспыт, өрөспүүбүлүкэ бастыҥ ыччата тоҕуоруһар куоратыгар Дьокуускайга тутуллан эрэриттэн дьоллоохпут.
Сонуннар
Ордук ааҕаллар
