"Сулус" саҥа мотуордары атыыласпыт

Ол курдук, хампаанньа сыананы «алдьаппыт» аатыран, маҥнай социальнай ситимнэргэ, сыыйа тырааныспар министиэристибэтигэр, хонтуруоллуур уорганнарга тиийэ элбэх кэпсэтии тахсыбыта. Хампаанньа бастаан саҕалыырыгар биэс мотуордааҕын суруйан турабыт.

Быйыл эбии түөрт мотуору атыыласпытын туһунан салайааччы Сергей Владимиров «Эхо столицы» биллэрдэ. Оттон айан-сырыы хаһан саҕаланара, өҥө сыаната билиҥҥитэ биллибэт.

«Саҥа суудуналар докумуоннарын оҥорторо сылдьабыт. Онон тиэйиинэн хаһааҥҥыттан дьарыктанарбытын билиҥҥитэ этэр кыахпыт суох. Бу сезоҥҥа үлэлээн саҕалыахпыт эрэ диэн этэр кыахтаахпыт. Оттон тарыып кээмэйин биһиги быһаарбаппыт», – диэтэ Сергей Владимиров.

Санатар буоллахха, былырыын «Сулус» атын тиэйээччилэртэн быдан чэпчэки сыананы туруоран, нэһилиэнньэ махталын ылыан ылбыта, бэл диэтэр, кытылга тиксэр сирдэрин оҥорууга норуот күүһүнэн субуотунньуктар ыытыллыбыттара.