«Сулус» космическай хараабыл

Ольга Федоровна Протопопова – Дүпсүн орто оскуолатын алын кылаас учуутала, эбии үөрэхтээһин педагога:

​1970-1990 сылларга  сылларга Москуба куоракка оскуола оҕолоругар аналлаах Бүтүн Сойуустааҕы «Космос» диэн эдэр ракетомоделистар уонна тиэхиньиктэр күрэхтэрэ ыытыллар этэ. Иван Данилович куруһуогун уолаттара бу күрэххэ 8 төгүл ситиһиилээхтик кыттыбыттара. Оҕолор мадьыалларын бэйэлэрэ толкуйдаан, бырайыактаан, оҥорор тэриллэрин дьиэлэриттэн булан-талан аҕалан ситэрэн-хоторон, бэртээхэй, киһи эрэ көрөн сөҕөр-махтайар экспонаттарын оҥорон таһаараллара. Хомойуох иһин, бу мадьыаллартан билигин түмэлбитигэр биир эрэ экспонат баар уонна, ол иһин биир саамай күндүбүт, туохха да тэҥнэммэт сыаналаахпыт.

Хаартыскаҕа: Вася Слепцов, Мирон Горохов. 1983 сыл.  

Бу – «Сулус» диэн ааттаах норуоттар доҕордоһууларын көрдөрөр межорбитальнай космическай хараабыл. Мадьыалы куруһуок уолаттара Мирон Горохов, Вася Слепцов, Аркадий Горохов, Сергей Босиков, Миша Копырин, Миша Протопопов, Проня Соловьев, Петя Ядреев таҥан оҥорбуттара. 1983 сыллаахха Вася Слепцов уонна Мирон Горохов XIII «Космос» куонкуруска баран ситиһиилээхтик көмүскээн, «Юный участник ВДНХ» диэн мэтээлинэн бэлиэтэммиттэрэ.

Сэбиэскэй кэмҥэ Москубаҕа ВДНХ-ҕа уонна Монголияҕа Улан-Баторга быыстапкаҕа турбут экспонаты биһиги түмэлбит ыалдьыттарыгар киэн тутта көрдөрөбүт.