Судаарыстыбаннай уонна уопсастыбаннай деятель Анатолий Чомчоев балаҕан ыйын 5 күнүгэр 75 сааһын туолбута

Үөһээ Бүлүү Далырыттан төрүттээх Анатолий Игнатьевиһы билбэт, кини аатын истэн аһарбатах Саха сирин төрүт олохтооҕо, арааһа, ахсааннаах да буолуо.

Кинини –  Чернобыль иэдээннээх саахалын туоратыыга быһаччы үлэлэспит полковник, Ил Түмэҥҥэ дьокутааттаабыт, экология тупсарын туһугар элбэҕи сүүрбүт-көппүт уопсастыбанньык, Үөһээ Бүлүү  улууһугар баһылыктаабыт, 1992-1994 сылларга СӨ Гражданскай оборуонаҕа судаарыстыбаннай кэмитиэтигэр бэрэссэдээтэллээбит учуонай киһибитин – дьон-сэргэ олус убаастыыр, ытыктыыр.

А.И. Чомчоев Уһук Илиннээҕи үрдүкү уопсай байыаннай команднай училищены, М.В. Фрунзе аатынан Байыаннай академияны, гражданскай көмүскэл академиятын бүтэрбитэ.

1990-1991 сс. Үрдүкү Сэбиэт аппараатын социальнай-экэнэмиичэскэй салаатын кылаабынай исписэлииһинэн, 1991-1992 сс –  РАН СО ЯНЦ айылҕа баайын кэлимник туһаныы экэниэмикэтин институтугар билим ыстаарсай сотруднигынан үлэлээбитэ.

Дьоҕус атомнай ыстаансыйаны туһаныыга киллэрэр ыра санаатын да өйөөччү аҕыйаҕа суох. Кини 2018 сыллаахха 15 кВТ кыамталаах дьоҕус, автономнай генератор моделын айан-толкуйдаан турар. Ааптар этэринэн, маннык установканы оҥорон туруорар киһи, быһа холуйан, 100 дьиэни... бүтүн 50 сыл устата энергиянан хааччыйыа этэ. Хомойуох иһин, ытык киһибит ыра санаата билиҥҥитэ олоххо киирэр сибикитэ көстүбэт.

А.Чомчоев бырайыагын бэлиэ уратыта – быһаарсар дьон этэринэн, уу оннугар салгыны туһанар гына толкуйдаммыт.

Анатолий Игнатьевич саха ис-хаан мындыр сээркээн сэһэнньитин кэриэтэ элбэҕи кэпсиир, бөлөһүөктүүр, мунньуммут билиитин үллэстэр бэсиэдэлэригэр, көрсүһүүлэригэр күн бүгүнүгэр диэри үтүмэн үгүс киһи мустара да  элбэҕи этэр.

Түөрт сыллааҕыта куһаҕан санаалаах, сааппат сирэйдээхтэр кинини быһаҕынан эчэппиттэрин, түмүгэр олоруҥ кырдьаҕаһы бэйэтин буруйдуурга дураһыйбыттарын, уопсастыбаннас улаханнык кэлэйэн, сиэрдээх быһаарыы ылылларын туруорсубутун өйдүүргүт буолуо? Хаһан да бэйэтин туһатыгар соххор солкуобайы, дьон көмөтүн ылбатах киһиэхэ норуот көхтөөх дьоно туох кыалларынан көмөлөһө сатаабыттара.

Атомнай саахалы туоратыыга сылдьан радиацияҕа түбэһэн, доруобуйата онто суох  аһааҕырыылаах кырдьаҕас ити быһылаан кэнниттэн уопсай туругар оҕустарбыта биллэр. Ол да үрдүнэн кини күүстээх санаатын көмөтүнэн, ыарахаҥҥа баһыйтарбат дуулаҕа дьулуурунан, тустаах дьарыгын бырахпат, ыытар чинчийиилэрин, бөлөһүөппүйэтин салгыыр. Бу буоллаҕа – эдэр да, эмэн да дьоҥҥо тус холобуру көрдөрүү диэн... 

Бырабыыталыстыба, Ил Дархан аатыттан кинини бырабыыталыстыба бэрэссэдээтэлин солбуйааччы Анатолий Семенов, дьокутааттар, уопсастыбанньыктар эҕэрдэлээтилэр, махтал тыллары анаатылар.

Ытыктабыллаах Анатолий Игнатьевичка эҕэрдэ истиҥэ буолуохтун!