Судаарыстыбаннай наҕараадалары туттардылар

Судаарыстыбаннай бэлиэлэри, үрдүк ааттары уонна грамоталары Бырабыыталыстыба бэрэссэдээтэлэ Кирилл  Бычков туттартаата.  

I истиэпэннээх «Ийэ Албан аата» бэлиэни тоҕустуу оҕону төрөппүт уонна иитэр Нам улууһуттан Туйара Панькова, Ньурба улууһуттан Жанна Семенова ыллылар.

II истиэпэннээх «Ийэ Албан аата» бэлиэнэн наҕараадаланнылар: Жатайтан Алеся Голикова, Нам улууһуттан Намира Иванова уонна Александра Кривошапкина, Ньурба улууһуттан Варвара Николаева. Кинилэр аҕыстыы оҕолоохтор.

III истиэпэннээх «Ийэ Албан аата» бэлиэни 7 оҕолоох 11 дьахтарга туттардылар:  Айталана Алексееваҕа, Виктория Алексееваҕа, Капитолина Гаврильеваҕа, Анна Григорьеваҕа, Надежда Домотоваҕа, Вера Ивановаҕа, Изабелла Мигалкинаҕа, Туйара Новиковаҕа, Апрелина Павловаҕа, Ольга Софроноваҕа уонна Сардана Третьяковаҕа.

Дьокуускайдааҕы «Кэскил» оҕо уһуйаанын сэбиэдиссэйэ Сардана Захароваҕа «СӨ үөрэҕириитин үтүөлээх үлэһитэ» аат иҥэрилиннэ. СӨ Ил Дарханын Грамотатынан Уус Алдан улууһун потребительскай кооперациятын бэтэрээнэ Матрена Жиркова, Дьокуускайтан Дьыаланы салайыыга салайааччыны солбуйааччы Лена Семенова уонна «Көмүлүөк» арт-устуудьуйа мастарыскыайын сэбиэдиссэйэ Кристина Яковлева наҕараадаланнылар.

СӨ Бырабыыталыстыбатын Грамотатын Субсидиялар агентствотын дириэктэрин бастакы солбуйааччы Наталья Николаеваҕа туттардылар. Бырабыыталыстыба Махтал суругун Намнааҕы история, этнография түмэлин киинэ, биидьийэ архыыбын салаатын сэбиэдиссэйэ Вера Попова ылла. «Гражданскай килбиэн» бэлиэ Саха сирин Худуоһунньуктарын сойууһун искусствоведа Зинаида Ивановаҕа туттарылынна.