Судаарыстыбаннай Дуума быыбарын быһа барыллаан түмүгэ

Өрөспүүбүлүкэ Киин быыбардыыр хамыыһыйатын бэрэссэдээтэлэ Евгений Федоров бүгүн ыыппыт пресс-кэмпириэнсийэтигэр быһа барыллаан ааҕыы “Биир ньыгыл Арассыыйа” баартыйа куолас 43,2 бырыһыанын ылан, кыайыылаах тахсыбытын иһитиннэрдэ.   Официальнай түмүк балаҕан ыйын 22 күнүгэр тахсыаҕын эттэ.

Ол аата, тутаах баартыйа туһатыгар уопсайа холбоон 143 729 киһи куоластаабыт. Иккис миэстэҕэ быыбардьыт 24,73 %  куолаһын ылан, КПРФ сылдьар. А.э. 82 622 киһи куоластаабыт. Үһүс бочуоттаах миэстэҕэ “Саҥа дьон” баартыйа тахсыбыт,  куолас 11,39% хомуйбут. Кинилэр туһаларыгар 38 040 киһи куолаһын биэрбит. Төрдүс миэстэ – 24 345 киһи куолаһын ылан, 7,29 бырыһыаны ситиспит «Сиэрдээх Арассыыйа» буолбут.  ЛДПР-га 21 467 киһи куоластаабыт (6,43%).

***

Биир мандааттаахха, эрдэ суруйбуппут курдук, Петр Шамаев кыайбыт. Киниэхэ быыбардааччы 37,35%-а биэрбит. Ол эбэтэр, 117 680 куолаһы ылбыт.

Иккис миэстэҕэ 53 611 куоластаах Федот Тумусов буолбут («Сиэрдээх Арассыыйа»,17,01%).

Үһүс бочуоттаах миэстэни үрдүк таһымҥа аан бастакытын хандьытаатынан турбут диэтэххэ, Нюргуяна Заморщикова («Саҥа дьон») норуот 46 472 куолаһын ылары ситиспит. Бу – уопсай быыбардааччы 14,75%-гар тэҥнэһэр.

Кини кэнниттэн КПРФ бэрэстэбиитэлэ Айан Васильев (КПРФ) сылдьар, киниэхэ 39 (12,41%) 107
быыбардааччы куолаһын эрэммит.

Оттон быыбарга киирсэр кыаҕа быһыллыбыт баартыйа бэрэстэбиитэлэ Анатолий Ноговицын («Яблоко» баартыйа) иһин 20 626 быыбардьыт куоластаабыт. Ол эбэтэр, куолас 12,41%  бырыһыанын ылбыт.

Бу быыбарга уопсайа 35 территориятааҕы быыбардыыр уокурук, 799 учаастактааҕы быыбардыыр хамыыһыйа үлэлээбит. Ити иһигэр 15 хамыыһыйа быстах кэмҥэ олорор быыбардааччылардаах 13 баахта бөһүөлэгэр уонна икки балыыһаҕа аһыллан үлэлээбиттэр.

***

Быыбар хаамыытын 3896 кэтээн көрөөччү кыраҕыиык кэтээбит. Итинтэн 1690-нара -- уопсастыбаннай кэтээн көрөөччү.

Евгений Федоров быйылгы быыбар ситиһиилээхтик ааспытын бэлиэтээн туран, куоластаабыт уонна быыбары ыытарга көмөлөспүт дьоҥҥо барыларыгар махтанарын тиэртэ.

Бу иннинээҕи, 2021 сыллааҕы Судаарыстыбаннай Дума быыбарыгар, КПРФ – 35,15%-ы ылан бастаан турар. Онно “Биир ньыгыл Арассыыйа” –– 33,22 бырыһыаны, “Саҥа дьон” –- 9,87%, “Сиэрдээх Арассыыйа”    –  8,19%, ЛДПР – 5,14% ылбытын "Интерфакс" быйылгы быыбарга сыһыаран, санаппыт.