Субсидияҕа хапсар буолаайаҕын?

ДьУоХХ өҥө сыаната үрдээн, судаарыстыба өйөбүлүн туһанар, о.э. субсидия аахтарар бырааптаах дьон, арааһа, эбиллэр чинчилээх.

Элбэх оҕолоохтор, сэрии бэтэрээннэрэ, СВО кыттыылаахтара, кини дьиэ кэргэннэрэ эрэ буолбакка, ыйдааҕы дохуоттарыттан 15-тэн тахса бырыһыана хомунаалынай төлөбүргэ барар ыаллар чэпчэтиинэн туһанар бырааптаахтар.

* Онуоха биир бастакынан интэриниэккэ http://subsidii-jku.ru сигэнэн киирэн, субсидия кимнээххэ ананарын, усулуобуйатын билсиҥ.

* Ол да үрдүнэн өйдөммөт баар түгэнигэр 8-800-222-50-70 эрийэн, ыйыталаһар, чопчулаһар кыахтааххыт.

* Вконтакте социальнай ситим нөҥүө эмиэ сибээстэһиэххэ сөп. «Субсидия ааҕыныстыбата» ГКУ Дьокуускай куорат Курашов уул., 1/1-гэр түстэнэн үлэлиир. МФЦ-тан да ыйыталаһар кыахтааххыт.

Ыйытыкка хоруй

— Социальнай өйөбүлү ылар дьон ханнык бааннарга каарталаах буолуохтаахтарый? Хайаан да «Алмаасэргиэнбаан» буолуохтаах дуу?

— ЖКУ төлөбүрүгэр көрүллэр субсидия булгуччу «АЭБ-ка» буолуохтааҕа ирдэммэт. Азиатско-Тихоокеанскай Бааҥҥа, Т-Бааҥҥа, Россельхозбааҥҥа, Сбербааҥҥа, Газпромбааҥҥа эбэтэр ВТБ-га да баар счеккутугар ыыттарар кыахтааххыт. Элбэх оҕолоох ыалларга ЖКУ-га көрүллэр 30 %-наах субсидияны ханнык баҕарар бааҥҥа ыыттарыахха сөп.  Элбэх кыбартыыралаах дьиэ хапытаалынай өрөмүөҥҥэ көрүллэр кэмпэнсээссийэ хапытаалынай өрөмүөн пуондатыгар баар анал счекка ыытыллар. Оттон СВО кыттыылааҕын дьиэ кэргэнигэр көрүллэр олорор дьиэ иһин төлөбүргэ уонна хапытаалынай усунуоска көрүллэр 50 %-наах кэмпэнсээссийэ харчытын ханнык баҕарар бааҥҥа ыыттарыахха сөп.

Уот, сылытыы, итии уу иһин төлөбүр уонна ДЭК-кэ көһүү туһунан

Бу дьыл муус устар 1 күнүттэн уот иһин төлөбүр быһа ДЭК ПАО төлөнөр буолбута.  Эрдэ «Якутскэнерго» ПАО төлөһөрбүт. Оттон билигин сылытыы, итии уу эрэ төлөбүрүн ылар буолла. Мантан инньэ ДЭК ыытар саҥа кибитээнсийэтигэр бу икки хааччыйар тэрилтэ өҥөлөрүн иһин төлөбүр киллэриллэр.

*Аны, муус устарга диэри уот иһин төлөбүргэ иэстээх сылдьыбыт дьон муус устарга диэри төлөбүрдэрин уруккулуу «Якусткэнерго»-ҕа төлүөхтээххитин умнумаҥ.

Ыам ыйыгар ... иккитэ аахпыттар.

Ол «көһө оонньообуппут» диэхтээн, ыам ыйыгар уот иһин төлөбүр иккитэ ааҕыллыбытын СИА суруйан турар. Ол эбэтэр, эрдэ төлөспүт дьон Тус кэбиниэттэригэр бэлиэр төлөөбүт суумалара иккистээн киирбит. Онон, өскөтүн «Якутскэнергоҕа» ордук төлөөн кэбиспит (переплата) түгэҥҥэ, ДЭК офиһыгар биитэр интэриниэт нөҥүө таһынан төлөммүт сууманы төннөрүҥ диэн сайабылыанньа суруллуохтаах. Онуоха сайабылыанньа былааҥкатын  ДЭК килийиэннэри кытта үлэлэһэр офиһыгар тиийэн эбэтэр туһааннах тэрилтэ саайтыгар киирэн хачайдыахха сөбө этиллэр.

Иккиһинэн, харчыгытын төннөрөллөрүгэр анаан бааҥҥа баар реквизиккит нүөмэрин уонна пааспар куоппуйатын холбуу хачайдаан угуллуохтаах. Оттон саҥа тэрилтэҕэ көһөрөр буоллахха – пааспар куоппуйата эрэ ирдэнэр.

«Болҕой: сайабылыанньа суруйбакка хааллахха, ол үп учуоттаммакка хаалар», – диэн анал сэрэтиилээх!

«Болҕой: сайабылыанньа суруйбакка хааллахха, ол үп учуоттаммакка хаалар!»

Кэнэҕэһин хомунаалынай өҥө иһин төлөбүрү кибитээнсийэ кэлбитин кэннэ төлөһөр ордугун, онно бэлэм QR-кодтаах буолан, табыгастааҕын сүбэлээбиттэр.

Ордук-хос төлөспүт буоллахха...

* Болҕой: Өҥөнү тиэрдээччи уларыйар кэмигэр уот иһин төлөбүр ордук-хос төлөммүт түгэнигэр, өҥөнөн туһанааччыга «уот иһин төлөбүргэр «переплата» (абаанса) баар диэн иһитиннэрии кэлиэхтээх. Ол сурукка үбү хайдах дьаһаныахха сөбө ыйыллыбыт буолуохтаах:

* Төлөөбүт киһи расчетнай счетугар төннөртөрөр буоллахха, үөһэ суруйбуппут курдук, сайабылыанньаны кытта харчы төннөрүгэр диэн, баан реквизитин ыйыллар.

* Эбэтэр төлөммүт үбү, төннөрө сатаабакка, кэлэр ый суотугар диэн ДЭК ПАО-ҕа баар сирэй счекка көһөттөрүөххэ сөп. Онно да син биир сайабылыанньа суруллар.

Муус устар 1 күнүн кэннэ, урукку үөрүйэҕинэн, уот төлөбүрүн кэм да «Якутскэнергоҕа» төлөөн кэбиспит буоллахха, ДЭК-тэргэ ол үппүн көһөрөн ылыҥ диэн сайабылыанньалаһыахха сөп. Эбэтэр «Якутскэнергоҕа» хаалларан баран, сылытыы иһин төлөбүргэ көһөрүллүөн син, биитэр туһанааччы расчетнай счетугар. Быһата, ити үс барыйаантан талыллар. Онуоха эмиэ:

1. ДЭК официальнай саайтын «Интернет-приемная» түннүгэр киирэн, салгыы «На территории РС (Я)» баттаан, сайабылыанньа былааҥкатын хачайданар.

2. Ону тэҥэ пааспарыҥ куоппуйатын уотун төлөспүт дьиэҥ ЕГРН-нын выпискатын кытта баан реквизиттэрин (төлөөбүккүн төннөрөрү талбыт түгэҥҥэр) суруйан, сайабылыанньаҕын толорон, ДЭК килийиэннэри кытта үлэлиир офиһыгар туттараҕын.

3. Эбэтэр ДЭК саайтыгар баар «Интернет-приемнайын» баттаан, («возврат-перенос переплаты» тиэмэни талан) онон биллэрэҕин.

Үһүс суол – ДЭК ПАО-ҕа баар Тус кэбиниэккэр киирэн «Обращение» диэни баттаан толороҕун.

Сиһилии иһитиннэриини ДЭК 8-800-234-7777 контакт-киинигэр эрийэн ыйыталаһыҥ, чопчулаһыҥ.

Дьиҥинэн, өрө-таҥнары көһүү биһиги баҕабытынан буолбатаҕын, эрдэттэн өйдөнөр гына быһаарбатахтарын быһыытынан, үөскээбит кыһалҕаны бэйэлэрэ быһаарыахтарын сөбө да, кэм да өҥөнү туһанааччы бэйэтэ хамсанарыгар күһэйдилэр. Өҥөнү туһанааччы быраабын көмүскүүр киин, дьэ, бу манна үлэлэһиэн сөбө.