Строительнай уокурукка дьаһалта отчуотун Антон Алексеенко оҥордо

Олунньу 10 күнүгэр Олохтоох дьаһалта отчуота икки сиргэ буолла – Арктикатааҕы судаарыстыбаннай агротехнологическай университет кэлэктиибигэр уонна Строительнай уокурук олохтоохторугар.
Строительнай уокурук олохтоохторун иннигэр отчуоту баһылыгы солбуйааччы Антон Алексеенко оҥордо. 
2024 сылга уокурукка Рыдзинскай уулуссатын Жорницкайтан Халтурин уулуссатыгар диэри кэрчигэр хапытаалынай өрөмүөн ыытыллыбыта, 6 элбэх кыбартыыралаах олорор дьиэ үлэҕэ киирбитэ. Хаарбах дьиэттэн көһөрүү бырагырааматынан 2030 сылга диэри Строительнай уокурукка 315 дьиэни көһөрүү былааннанар. 
Биир бөдөҥ тутуунан «Спутник» оҕо лааҕырыгар түөрт куорпус үлэҕэ киирбитэ буолар. Пирогов уулуссатыгар 4 №-дээх 180 миэстэлээх анал (коррекционнай) оскуола-интэринээт дьиэтин уонна «Спортивнай» саҥа түөлбэҕэ 240 миэстэлээх оҕо саадын тутуу салҕанар.

Быйыл Строительнай уокурукка 5 уулусса өрөмүөннэнэр, икки үөрэх кыһатын тутуу салҕанар, Якутская уулуссаҕа спорт саалата тутуллар. Дзержинскэй, 45/1, 45/2, Рыдзинскай, 18/2, 18/13, 18/14, 18/14Б, 18/14Д аадырыстарга тиэргэн өрөмүөнэ былааннанар. 
Уокурук олохтоохторо салалтаттан Космонавтар уонна Пионерская уулуссалары сайыҥҥы өттүгэр уунан ыстарыыны, ТОСтарга, элбэх оҕолоохторго көрүллэр өйөбүл миэрэлэрин, Рыдзинскай уул. турар түүҥҥү кулуубу сабыыны, эмиэ бу уулуссаҕа тротуар наадатын, уокурукка боксанан дьарыктанар саала суоҕун ыйдылар, оптуобус реформатын ыйыталастылар. 
Маны сэргэ медиктэргэ уонна тутааччыларга сквер тутарга, Дьокуускайдааҕы индустриальнай-педагогическай колледж баазатыгар матассыыкыл спордунан дьарыктанар автодром тэрийэргэ этии киллэрдилэр, диэн иһитиннэрэр Олохтоох дтаһалта пресс-сулууспата.