Статустар, статустар...

Ким тугу тыыммытын барытын билэ олоробут. Урут үҥкүүлүүрбүн, күүлэйдиирбин аһара сөбүлүүр бэйэм билигин рестораҥҥа, түүҥҥү кулууптарга да сылдьыбат буоллум. Тоҕо диэтэххэ кыраҕы харах видеонан устан тарҕата охсуу эн дьиэҕэр тиийэ да иликкинэ тута группаларынан тарҕана, статуска тахса охсор. Онон олуһун диэн туттунаммын, түннүгүм сабыыларын бүөлээн эрэ баран хамсанар, үҥкүүлүүр буолан турабын.

Дьэ, мин туран статустары көрөн бардым. Сарсыарда аайы саҥа күнү айхаллаан ыыт да ыыт, саҥа күн буолбутун ким да билбэтигэр дылы. Далбаатаныы кытаанаҕа. Дьэ, онтон күнү күннүктээн утуйаргар эрэ төлөпүөҥҥүн ууруоххар диэри салҕанар ээ.

Туох да аһара элбэх реклама от күөх өҥнөөх сетевой хампаанньалартан кэлэр. Урут син кинилэр бороһуоктара, битэмииннэрэ, чэйдэрэ суох олорбуппут ээ. Дьэ, суох доҕор, хайаан да ылыахтаахпыт, чэпчэтии бүгүн эрэ диэн буолар. Олору ыллахпытына, ырабыт, дьүдьэйэбит, саахарбыт намтыыр, дабылыанньабыт оннун булар, сүһүөхпүтүгэр сүүрэ сылдьар буолабыт. Оруобуна биһиги, биэнсийэлээх дьон, диагнозпыт барыта суруллар.

Салгыы көрөбүт. Дэриэбинэ дьонун статустара олус интэриэһинэй. Сүөгэй, суорат, ыаммытынан үүт, оҕуруот, сибэкки арассаадатын атыыта, атастаһыыта, ханна эрэ ким эрэ эриэн сүөһүтэ сүппүтэ, хара ыт ытыра сыспыта, маҕаһыыҥҥа туох кэлбитэ, килиэп тахсыбыта, уот барбыта – барыта. Дойдуҥ олоҕун, тугунан тыынарын олох толору билэ-көрө сылдьаҕын.

Куораттар статустара үксэ күүлэй, ресторан, тугу аһаабыттара, ханна кимниин сылдьыбыттара, ол быыһыгар чалбахпыт, бадарааммыт, кирбит-хохпут, үөрүү, үөҕүү, уруй-айхал.

Эр дьон уонна дьахталлар статустара араас-араас буолар. Эр дьон билигин үксэ булт тиэмэтин таарыйаллар, сотору кэминэн ыаллар хас куһу сиэбиттэрин, төһө собону ыһаарылаабыттарын барытын билиэхпит турдаҕа. Оттон ол кэмҥэ кэрэ аҥаардар оҕуруоттарын, арассаадаларын атастаһыы, ылсыы-бэрсии, эмиэ киэһээҥҥи аһылык айдаана, хас ынах төрөөбүтэ, оҕолор, сиэннэр ситиһиилэрэ.

Сорох ардыгар ким эрэ үбүлүөйүгэр тэҥҥэ сылдьыбыт, бырааһынньыктааҕы кэнсиэри бүтүннүү көрбүт курдук сананаҕын. Бэл, астарын кытта тэҥҥэ асаһаҕын эбээт.

Ким эрэ сүбэтэ, лайфхак диэннэрэ эмиэ олус туһалаах буолааччы. Оттон билэр киһиҥ соҕуруу эбэтэр омук сиригэр баран кэлбитин, тугу атыыласпытын, кимиэхэ бэлэх аҕалбытын билэриҥ диэн – сөкүүндэнэн дьыала.

Дьэ, онон, доҕоттор, олус сэргэх, интэриэһинэй олохтоохпут дии санаабаккыт дуо? Босхо сүбэлэр, интэриэһинэй сонуннар, билэр-билбэт киһиҥ тус олоҕо тахса турарын билигин ким да боппот, барытын кыраҕы харахпытынан кэтии олоробут.