Өссө 30 саҥа оптуобус кэлиэҕэ

2026 сылга Дьокуускайга 30 саҥа оптуобус кэлэрэ былааннаммыта. Суол инфраструктуратын уонна тырааныспар департаменыгар иһитиннэрбиттэринэн, саҥа оптуобустары атыылаһыы икки түһүмэҕинэн ыытыллар. Билигин 19 оптуобуһу атыылаһан аҕаларга поставщиктары талыы бара турар. Эбии 11 оптуобус ылыыта, СӨ Тырааныспарга уонна суол хаһаайыстыбатыгар министиэристибэтин субсидияҕа сайаапката туһааннаах федеральнай уорганнарга ыытыллыбытын кэннэ эрэ ситиһиллиэҕэ.

Дьокуускайга оптуобус пааркатын хаҥатыы – олохтоох дьаһалта нэһилиэнньэ олоҕун тупсарыыга туһуламмыт үлэтин биир сүрүн соруга. Уматык экологичнай көрүҥүнэн барар, доруобуйаларынан хааччахтаах дьоҥҥо табыгастаах оптуобустар киин куорат уопсастыбаннай тырааныспарын нэһилиэнньэҕэ оҥорор өҥөтүн тупсараллар. Саҥа ылыллар оптуобустарга ураты болҕомто хаачыстыбаларыгар ууруллар, оптуобустар бары климат-хонтуруоллаах, видеокамералаах уонна бырайыас төлүүр валидатордаах буолаллара ирдэнэр.