«Спутник» лааҕырга саҥа куорпустар үлэҕэ киирдилэр

Тохсунньу 30 күнүгэр Дьокуускай «Спутник» оҕо лааҕырыгар түөрт саҥа куорпуһу арыйыы үөрүүлээх быһыыга-майгыга буолла.
Тэрээһиҥҥэ видео-сибээһинэн Федерация Сэбиэтин бэрэссэдээтэлэ Валентина Матвиенко, үөрэх миниистирэ Сергей Кравцов итиэннэ Ил Дархан Айсен Николаев, Дьокуускай куорат баһылыга Евгений Григорьев кыттыыны ыллылар.
Федерация Сэбиэтин салайааччыта Валентина Матвиенко дойду судаарыстыбаннай политикатын сүрүн тосхолунан оҕо сынньалаҥар табыгастаах усулуобуйаны тэрийии турарын тоһоҕолоото. Ил Дархан Айсен Николаев бэлиэтээбитинэн, 2027 сылга диэри Саха сирин араас улуустарыгар федеральнай бырагыраама иитинэн уопсайа 700 миэстэлээх 14 саҥа модульнай куорпус үлэҕэ киирэрэ күүтүллэр. 
Бүгүҥҥү күҥҥэ Саха Өрөспүүбүлүкэтигэр оҕо сааһы өйүүр сыаллаах  2030 сылга диэри ылыллыбыт Оҕо сынньалаҥын сайыннарыы уонна чэбдигирдии концепцията үлэлиир. 
Куорат баһылыга Евгений Григорьев бэлиэтээбитинэн, «Спутник» лааҕыр саҥа куорпустара «Үөрэхтээһини сайыннарыы» судаарыстыбаннай бырагыраама «Оҕо уонна ыччат үөрэҕэр, сынньалаҥар усулуобуйаны тэрийии» бырагырааматынан үлэҕэ киирдилэр. Тутууга уопсайа 197 мөл. солк. тыырыллыбыттан, 144,5 мөл. солк. федеральнай бүддьүөттэн киирбит, 43,5 мөл. солк. 
– куорат бэйэтин бүддьүөтүттэн, 9,2 мөл. солк. – өрөспүүбүлүкэ хааһынатыттын. Евгений Григорьев быйыл 65 сааһын бэлиэтиир «Спутник» лааҕырга бу бэртээхэй бэлэх буолбутун бэлиэтээтэ. 
Санатар буоллахха, РФ үөрэххэ министиэристибэтэ оҕо аймахха аныгылыы инфраструктураны тэрийиигэ ыыппыт куонкуруһугар Саха сирэ Дьокуускай куорат таһынааҕы «Спутник» оҕо лааҕырыгар түөрт хапытаалынайа суох куорпуһу тутууга сайаапка түһэрбит. Түргэнник таҥыллар конструкциялартан тутуу ааспыт сыл ахсынньы ыйыгар түмүктэммит. Ол туһунан Олохтоох дьаһалта пресс-сулууспата иһитиннэрэр.