«Спортивнай» түөлбэҕэ бастакы социальнай эбийиэк арылынна

3,7 тыһыынча квадратнай миэтэрэ иэннээх саҥа дьиэ 12 бөлөҕүнэн 240 оҕо сылдьарыгар суоттанан тутулунна. Манна физкултууранан, музыканан дьарыктанар саалалар, медицина хоһо, галокамера, пищеблок, спорт былаһаакката, о.д.а. барыта баар.

Үөрүүлээх тэрээһиҥҥэ Ил Дархан Айсен Николаев, Дьокуускай куорат баһылыга Евгений Григорьев, СӨ Бырабыыталыстыбатын Бэрэссэдээтэлин солбуйааччы Анатолий Семенов, үөрэх миниистирэ Нюргуна Соколова, «Сэттэ» утуу хампаанньатын дириэктэрин солбуйааччы Николай Скрыбыкин, о.д.а. кыттыыны ыллылар.

Уһуйаан сэбиэдиссэйэ Мария Коробенкова бэлиэтээбитинэн, «Улыбка» оҕо саада «Одарённый ребёнок, шахматы – детям» бырайыак инновационнай былаһаакката уонна бу бырагырааманы олоххо киллэрэр «Мозаичный парк» федеральнай былаһаакка буолар эбит. Кулаковскай уулуссатыгар үлэлиир сүрүн дьиэлэригэр 6 бөлөҕүнэн 180 оҕо сылдьар, дьарыктар нууччалыы уонна сахалыы тылынан ыытыллаллар. Онон оҕолору кытта иитээччилэри таһынан педагог-психолог, учуутал-логопед, эбии үөрэхтээһин педагога, хореограф, нуучча тылын учуутала, робототехника учуутала курдук исписэлиистэр үлэлииллэр.

Бэлиэтээн эттэххэ, «Улыбка» уһуйаан саҥа дьиэтэ дойду баһылыга Владимир Путин өйөбүлүн ылбыт Дьокуускай куорат маастар-былаанын олоххо киллэрии иитинэн тутулунна.

Санатар буоллахха, Территориялары кэлимник сайыннарыы (КРТ) бырагырааматынан 17-с кыбаарталга бу уһуйааны сэргэ элбэх функциялаах спорт саалата, 50 элбэх кыбартыыралаах олорор дьиэ, 550-нуу миэстэлээх икки улахан оскуола тутуллуохтара. Бүгүҥҥү күҥҥэ бу баараҕай былааны олоххо киллэрэргэ өссө 17 хаарбах дьиэ олохтоохторун көһөрөр сорук турар.