Спортивнай сыл түмүктэрин таһаардылар

2025 сыл спорка ситиһиилэрин ахсынньы 18 күнүгэр Саха тыйаатырыгар спортсменнар, тренердэр, спорт бэтэрээннэрэ, былаас, уопсастыбаннас бэрэстэбиитэллэрэ кыттыылаах бэлиэтээтилэр.

Баһылыгы солбуйааччы Юрий Петров тоһоҕолообутунан, Дьокуускай куорат баһылыга Евгений Григорьев чөл олох иһин аһаҕастык охсуһар, спорду күүскэ өйүүр.

Ол да быһыытынан, спорка уонна физическэй култуураҕа управление начаалынньыга Эдуард Ефимов иһитиннэрбитинэн, ааһан эрэр 2025 сылга аҥаардас Дьокуускай куоракка 220 спорт тэрээһинэ 43 тыһыынча киһи кыттыылаах ыытыллыбыт, ол иһигэр: 100 км сүрүүгэ Арассыыйа чемпионата, 14 тыһыынчаттан тахса киһи кыттыылаах сүүрүүгэ күрэхтэһиилэр, 4500 киһи ГТО нуорматын туттарыыта, 80 үөрэтэр-эрчийэр дьарык, 33 биирдиилээн бастыыр иһин күрэхтэһиилэр уонна спорт адаптивнай көрүҥнэригэр спартакиадалар.

Куорат уулуссаларыгар саҥа 4 воркаут-былаһаакка туруорулунна, 10 ДЮСШ үлэлээн, спордунан уонна физическэй култууранан дьарыктанааччы оҕо ахсаана ааспыт сыллааҕар 20% улааппыт.

Санатар буоллахха, бу күн үгэс курдук сыл бастыҥнара бочуоттаах грамоталарынан, түөскэ иилиллэр бэлиэлэринэн, махтал суруктарынан бэлиэтэннилэр.