«Спортивнай» спорт саалата 80% бэлэм

Ол туһунан бүгүн, ахсынньы 9 күнүгэр, куорат баһылыгын солбуйааччы Владимир Аржаков бэйэтин тг-ханаалыгар суруйда.

«Спортивнай» түөлбэҕэ тутуллар элбэх функциялаах спорт саалатын тутууга бүгүҥҥү күҥҥэ 56 киһи үлэлии сылдьар, эбийиэк 80% бэлэм, диэн буолла.

Көһө сылдьар мунньахха Ил Түмэҥҥэ «Биир кэлим Арассыыйа» фракциятын салайааччыта, СӨ кикбоксинг федерациятын салайааччыта Алексей Колодезников, Дьокуускай куораттааҕы физическэй култуура уонна спорт управлениетын начаалынньыгын солбуйааччы Эдуард Старостин, «Ростройконтроль» ФБУ инспектора Александр Хантаев, саҥа дьиэ хаһаайына, 5 №-дээх ДЮСШ дириэктэрэ Василий Кычкин уонна бэдэрээтчит Николай Варламов кыттыыны ылбыттар.

Санатар буоллахха, тутуу ахсынньы ый иккис дэкээдэтигэр түмүктэнэн, тохсунньу ыйга үлэҕэ киириэхтээх. Оччотугар Строительнай уокурук оҕолоро спорт үгэс буолбут көрүҥнэрин таһынан скалодромуман, единоборствонан, хореографиянан дьарыктанар толору кыахтаныахтара.

Ааспыт биэс сылга киин куоракка үс саҥа ДЮСШ, үс оскуолаҕа спорт саалата уонна 43 воркаут-былаһаакка тутулунна. Ол түмүгэр куорат ДЮСШ-ларынан 8 тыһыынча оҕо хабылынна.