«Спортивнай» саалата үлэтин саҕалаата

Букатын соторутааҕыта эрэ бу миэстэҕэ турбут икки хаарбах дьиэ көтүрүллэн, 90-тан тахса киһи саҥа дьиэҕэ көһөн, баара эрэ сылга тиийбэт кэм иһинэн үлэҕэ киирбит саҥа эбийиэги арыйыыга өрөспүүбүлүкэ Ил Дархана Айсен Николаев, куорат баһылыга Евгений Григорьев кыттыыны ыллылар.

Бу 2000 кэриҥэ кв.миэтэрэ иэннээх сүүнэ эбийиэк Дьокуускай куорат маастар-былаанын биир пуунун быһыытынан «Саха Өрөспүүбүлүкэтигэр физическэй култуураны уонна спорду сайыннарыы» судаарыстыбаннай бырагыраама иитинэн тутулунна. Манна күннэтэ сүүһүнэн киһи дьарыктанарыгар скалодром, тренажернай саала, тустуу, бокса, кикбоксинг секциялара үлэлиэхтэрэ. Аныгы кэм ирдэбилинэн медкабинет, инструктордар, администрация хосторо барыта баар.

Тутуу сакаасчыта - «Главстрой» МХТ, бэдэрээтчит -  «Артыкстрой» ХЭУо, диэн Олохтоох дьаһалта пресс-сулууспата иһитиннэрэр.

Санатар буоллахха, ый анараа өттүгэр 17-с кыбартаалга эмиэ куорат маастар-былаанынан бастакы социальнай эбийиэк үлэҕэ киирбитэ - куорат 43 -дээх «Улыбка» уһуйаанын филиалын дьиэтэ.

Территориялары кэлимник сайыннарыы (КРТ) бырагырааматынан 17-с кыбаарталга салгыы 50 элбэх кыбартыыралаах олорор дьиэ, 550-нуу миэстэлээх икки улахан оскуола тутуллуохтара. Бүгүҥҥү күҥҥэ бу баараҕай былааны олоххо киллэрэргэ өссө 17 хаарбах дьиэ олохтоохторун көһөрөр сорук турар.