Спортивнай албан аат түмэлэ

Түмэл бастаан Д. Коркин 1967 сылтан 1977 сылга диэри олорбут дьиэтигэр арыллыбыт. 1988 сыллаахха Д.П. Коркин уҥа илиитэ К.С. Постников доҕорун кэриэһигэр манна музей тэрийэр. Ол кэмҥэ 3145 экспонаттааҕа.

2003 сыллаахха Д.П. Коркин төрөөбүтэ 75 сыллаах үбүлүөйүгэр Спортивнай албан аат музейа арыллар. Бу күҥҥэ 5 тыһыынчаттан тахса экспонаттаах музейга спорду сэҥээрээччи, көрөөччү элбэх киһи сылдьар. Өрөспүүбүлүкэ араас улуустарыттан ураты Арассыыйа куораттарыттан, ону ааһан Кытай, АХШ, Монголия, Казахстан, Словакия, Киргизия, Корея, Япония, Польша, Голландия курдук тас дойдулартан бэрт элбэх киһи кэлэн ааһар түмэлэ буолар.

Анна Петровна Спиридонова, Чурапчытааҕы Д.П. Коркин аатынан Спортивнай албан аат түмэлин научнай үлэһитэ:

– Биһиги түмэлбит «Киин куорат» таһаарыы «Түмэл киэн туттар экспоната» диэн бырайыагар саха тустуутун аан дойдуга таһаарбыт улуу тренер бэйэтин илиитин сылааһын биэрэн суруйбут кинигэтинэн кыттар.

Ол историятын сэгэттэхпитинэ, маннык эбит. 1964 сыллаахха Дмитрий Петрович Японияҕа Олимпийскай оонньууларга Саха сириттэн 3 киһи иһигэр киирсэн барбыт. Онно Япония тустууктарын кэтээн көрөн, сахаларга маарыҥнаппыт. Быһыыларын-таһааларын, туттууларын-хаптыыларын көрөн баран, сахалары да дьарыктаатахха, чыпчаалга тахсыахпытын сөп эбит диэн санааҕа кэлбит.

Японияттан кэлэн баран ол санаатын ити кинигэ кэннигэр харандааһынан андаҕар курдук суруйбут. Японияҕа сылдьан өссө 48 кг Олимпийскай оонньууга киирэр диэни истэр уонна «48 кг будет урожайным для якутов, а не для японцев» диэн бигэ санааҕа кэлэр.

Ол андаҕар суруллубутуттан биир сыл ааһар. 1965 сылга көҥүл тустууга Вячеслав Карпов эдэрдэргэ ССРС чемпиона буолар. 2026 сыллаахха Госдуума физическэй култуураҕа уонна спорка сис кэмитиэтин бэрэссэдээтэлэ Олег Васильевич Матыцин Саха сиригэр кэлэ сылдьан, биһиэхэ, Чурапчы Спортивнай албан аат музейыгар, ыалдьыттыыр уонна бу кинигэҕэ Д.П. Коркин бэлиэтээһиннэрин сөҕө-махтайа ааҕан турар.