Спорт нөҥүө олоххо тардыһыыны саҕар педагог

Ольга Васильевна Адамова дириэктэрдээх оскуола бүгүҥҥү күҥҥэ 430 үөрэнээччилээх. Оскуолаҕа идэлэригэр бэриниилээх, оҕолорго сылаас сыһыаны саҕар, уйан сүрэхтээх педагогтар үлэлииллэр.

Кинилэртэн биирдэстэрэ – Юрий Иванович Ощепков. Кини Уһук Илин региоҥҥа Петропавловск-Камчатскай (2010), Екатеринбург (2011) куораттарга ыытыллыбыт Арассыыйа физкултуура учууталларын куонкурустарын кыайыылааҕа. Ааспыт сылга Дьокуускай куорат «Сыл бастыҥ тренерэ» аатынан бэлиэтэммитэ (2025). Ону таһынан куорат физкултуура, ОБЗР учууталларын, спорт оскуолатын тренердэрин аттестациялыыр экспертнэй хамыыһыйа чилиэнэ.

Юрий Ощепков аатынан Өрөспүүбүлүкэтээҕи физкултуура учууталларыгар  уонна тренердэргэ куонкурус 5-тии сыл буола-буола ыытыллар.

Дьэ, маннык таһымнаах педагог иитиллээччилэрэ – доруобуйаларынан хааччахтаах оҕолор сылын аайы спорка үрдүк көрдөрүүлэнэн,  төрөппүттэригэр, учууталларыгар үрдүк үөрүүнү бэлэхтииллэр. Саха сирин Арассыыйаҕа ааттаталлар.

Юрий Иванович Ощепков, Арассыыйа үтүөлээх учуутала, Арассыыйа үөрэҕириитин бочуоттаах үлэһитэ:

– Уопсайа 37 сыл педстажтаахпын. Бу оскуолаҕа 25 сыл тренеринэн үлэлээн кэллим. Хас биирдии күрэхтэһии кэнниттэн доруобуйаларынан хааччахтаах  оҕолор олоххо сыһыаннара, бэйэлэрин кыахтарыгар эрэллэрэ өссө күүһүрэрин бэлиэтии көрөбүн. Кинилэр спордунан дьарыктанан, олоххо сыал-сорук туруорунан,  инники диэки хардыыттан хардыыга баран иһэллэриттэн тренер-педагог быһыытынан ордук астынабын.

– Бу оскуолаттан элбэх оҕону Арассыыйаҕа таһаарбыт тренер буоллаҕыҥ дии. Кинилэр ааттара кимнээҕий, Юрий Иванович?

– Хас биирдии үөрэнээччибит аатынан киэн туттабыт. Ол курдук, Алексей Баев биһиги оскуолабыт выпускнига. Кини пауэрлифтинг көрүҥҥэ  Арассыыйа хас да төгүллээх чөмпүйүөнэ.  АБДь бэтэрээнэ. Билигин Мохсоҕоллоох орто оскуолатыгар физкултуура учууталынан үлэлиир. Өрөспүүбүлүкэ хас да төгүллээх, Арассыыйа икки төгүллээх  чөмпүйүөнэ Данила Егоров баар. Андрей Котляров пауэрлифтиҥҥэ Арассыыйа спордун маастара. Маастарга хандьыдааттар Еремей Ушницкай, Оксана Владимирова бааллар. Маршал Константин Рокоссовскай аатынан байыаннай училище курсаана Максим Багаутдинов, АБДь бэтэрээнэ. Бу кинилэр бары биһиги оскуолабытыгар үөрэммит уонна бу көрүҥүнэн миэхэ дьарыктаммыт оҕолор.

Бу сылга доруобуйаларынан хааччахтаах дьоҥҥо Нижнэй Тагил куоракка ыам ыйын саҥатыгар буолан ааспыт күрэхтэһиигэ Арассыыйа 7 регионуттан үһүс миэстэни ылары ситистибит. 76 кг  кыргыттарга  кыһыл көмүс мэтээл хаһаайкатынан Олеся Толстоухова буолла. Оттон 63 кг боруонса мэтээли Фаина Кузьменко ылла.  Кыргыттарым туох баардарын ууран туран кииристилэр. Нэдиэлэ устата күҥҥэ үстэ эрчиллэн, сүүмэрдэнэн, Фаина Кузьменко 1 улахан дьон спортивнай разрядын ылла, Олеся Толстоухова – 3 улахан дьон спортивнай разрядын.

Бу 2025-2026 үөрэх дьыла биһиги оскуолаҕа  үрдүк ситиһиилээх. Ол курдук, үөрэхпит сылын Инклюзивнай футболга Арассыыйа чемпионатыгар 6 үөрэнээччибит чөмпүйүөн үрдүк аатын ылан саҕалаабыттара. Сылга  Арассыыйа үс призерун иитэр буоллахпына, бу үөрэх дьыла ханнык да сыллааҕар ситиhиитэ улахан. Ол курдук, Сахабыт сиригэр чуолаан биһиги үөрэнээччилэрбит Арассыыйа 7 кыһыл көмүс уонна 1 боруонса мэтээлин аҕаллылар.
Манна төрөппүттэр, үөрэтэр учууталлар көмөлөрө, өҥөлөрө сүҥкэн.

– Арассыыйа таһымнаах күрэхтэһиигэ барар спортсменнары ким үбүлүүрүй?

– Биһиги үөрэнээччилэрбит күрэхтэһиигэ барар-кэлэр ороскуоттарыгар тиийэ сыл аайы спонсордыыр дьоммутугар махталбыт муҥура суох. Ол курдук, «Водоканал» тэрилтэ салайааччыта Анатолий Андреевич Кырджыгасов, «Промстрой» САУо гендириэктэрэ  Лариса Рашитовна Панькова, «Силуэт» атыы-эргиэн дьиэтин дириэктэрэ Виолетта Валерьевна Сантуева, биирдиилээн урбаанньыттар Влада Петровна Ощепкова, Анатолий Васильевич Кусатов өрүү биһиэхэ көмөлөһөллөрүгэр махталбытын тириэрдэбит.

Дьокуускай куораттааҕы Адаптивнай үөрэхтээһин комплексын пауэрлифтиҥҥэ тренерэ РФ үтүөлээх учуутала, Арассыыйа үөрэҕириитин бочуоттаах үлэһитэ Юрий Иванович Ощепков уопутун Арассыыйа атын регионнарыгар тарҕатар сыаллаах Москуба куораттан кэлэн документальнай киинэ устубуттара. Бу Арассыыйа бэрэсидьиэнин өйөбүлүнэн олоххо киирэр «Гражданин России» бырайыак чэрчитинэн. Киинэ сэтинньи ыйга тахсара күүтүллэр. Эбэн эттэхпитинэ, Юрий Иванович Дьокуускай куорат Аҕаларын сүбэтин президиумун чилиэнэ, 4 оҕо аҕата, 5 сиэн эһэтэ.