SPF кириэми хайдах талабыт?

 Ультрафиолет организмҥа барар үгүс эттиктэр атастаһыыларыгар төһүү буолар, онон күҥҥэ сыламнаан тириибит хараарарын таһынан, ньиэрбэ күүрүүтүн, депрессияны утары охсуһар кыахтанабыт. Дьиҥэ, күҥҥэ сыламнааһын киһи доруобуйатыгар, уҥуоҕар, сүһүөхтэригэр D битэмиини ылар саамай табыгастаах натуральнай ньымабыт.

Ол эрэн күн сыралҕаныгар сырыттахха тирии коллагена, эластина алдьанар – эдэр буолууга эппиэттиир эттиктэр аҕыйыыллар. Ультрафиолет сардаҥата тирии эпидермальнай бүрүөһүнүн алдьатар, көмүскэнэ сатаан тирии тутула алдьанар, халыҥыыр, капиллярдара быһыта бараллар, эластин тутула тосту уларыйар. 

Харыстанар кириэмэ суох наар загаардыыр киһи тириитэ улаханнык кырдьар, куурар, мырчыстаҕастара элбиир, пигментнэй бээтинэлэр, куперозтар үөскүүллэр. 

Күҥҥэ хараарыы меланома (араак) курдук ыарахан ыарыыга тиэрдиэн сөп. Солярийга элбэхтик сылдьар дьон эмиэ бу ыарыыттан сэрэхтээх буолуохтаахтар. 

11:00-15:00 чч. икки ардыгар күн саамай күүскэ тыгар – бу кэмҥэ аһаҕас күн анныгар өр сылдьар доруобуйаҕа буортулаах.

Сирэйбит тириитэ күҥҥэ аһара хараарбатын туһугар SPF кириэминэн соттуохтаахпыт, маныаха ханнык барсарын маннык быһаарабыт:

• Күҥҥэ түргэнник "умайар" дьоҥҥо SPF 50+ барсар.
• Тириигит күҥҥэ сиэнэр эрээри, онтугут аҕыйах хонугунан загаар буолар буоллаҕына, бастаан SPF 50+ туттан баран сыыйа SPF 30 көһүөххэ сөп.
• Күҥҥэ умайбат, биир тэҥник загаардыыр буоллаххытына, SPF 30.

SPF (Sun Protection Factor) 50 кириэминэн сотуннахпытына, 500 мүнүүтэҕэ тиийэ куттаммакка күҥҥэ сыламныахпытын сөп. 

SPF кириэм арааһа баар. Олортон комбинированнай дьайыылаах диэни талар ордук –  UVA уонна UVB фильтрдаах буолаллар. Маннык кириэмнэр хахтарыгар “Broad Spectrum” (широкий спектр защиты) диэн маркировканы көрдүүбүт. 

Кэрэ аҥаардар Корея косметикатын хото туһаналлар. Кореянкалар күнтэн харыстаныыга улахан болҕомтолорун уураллар, бэл, дьиэ иһигэр кытта анал кириэминэн соттоллор. Тоҕо диэтэххэ, түннүк өстүөкүлэтин күн UVА-спектрдаах сардаҥалара холкутук нөҥүөлүүллэр эбит – маны кинилэр кырдьыы, пигментация биир сүрүн төрүөтүнэн ааҕаллар. 

Күнтэн харыстанар кириэми атыылаһаргытыгар SPF уонна PA (PPD) диэн суруктаахтары талар ордук. Маны тэҥэ косметика маҕаһыыннарыгар күнтэн харыстыыр кириэми бэрэбиэркэлиир сиэркилэлэр баар буолаллар. Ону туһанан чахчы харыстыыр кыахтаах кириэми булан ылыахха сөп.

Күнтэн көмүскүүр кириэминэн соттон баран киэһээтин тириибитин кичэйэн ыраастыахтаахпыт, тоҕо диэтэххэ SPF кириэмнэр көннөрү уунан сууйуллан хаалбаттар. Хас да түһүмэхтээх суунуу, ыраастаныы, тониктааһын хайаан да наада буолар. Холобур, SPF кириэми гидрофильнай арыынан, щербетинэн ыраастаан эрэ баран пенканан, гелинэн сууннахпытына барар.