«Союз строителей Якутии» ыарахан уйуктаах тиэхиньикэ сырыытын хааччахтааһыҥҥа уларытыылары киллэриини туруорсар

Биллэрин курдук, маннык хааччаҕы булгуччулаах тутуһууну кэлиҥҥи сылларга ордук сааскы ириэрии саҕаланыаҕыттан хонтуруоллуур уорганнар эрэ буолбакка, нэһилиэнньэ кытта ирдиир. Дьаһал төрүөтүнэн, бары өйдүүрбүт курдук, ыарахан уйуктаах тиэхиньикэ куорат уулуссаларын алдьатара, онно эбии кумах, гравий курдук тутуу матырыйаалын тиэнэ сылдьан, тутуу былаһааккаларыттан көлүөһэтигэр кири-хоҕу сыһыаран аҕалан куораты киртитэрэ буолара саарбаҕа суох. Хааччахтааһыны аахайбат тэрилтэлэри туһааннаах тэрилтэлэр ыстарааптыыллар. Ол курдук, Олох-дьаһах, хомунаалынай хаһаайыстыба уонна энергетикэ департаменын начаалынньыга Иван Негнюров былырыын үгүс тутуу хампаанньаларын кытта куорат ирдэбилин тутуһууга өйдөһүү баарын, тэрилтэлэр тутуу былаһааккатыгар көлүөһө сууйар анал миэстэни оҥостоллорун этэн турар. Хомойуох иһин, быраабыланы тутуспат, куорат ирдэбилин улахаҥҥа уурбат тэрилтэлэр суох буолбатахтар. Холобура, 2025 сыллаахха Дьокуускай куоракка Арбитражнай суут дьиэтин тутууга үлэлиир «РусСтрой» диэн хампаанньаҕа Дьокуускай куорат Административнай хамыыһыйата иккитэ административнай буруйу оҥоруу туһунан боротокуолу толорбутун, ыстараап түһэрбитин да үрдүнэн бэрээдэги кэһэрин тохтоппотун туһунан суруйан турабыт.

Онон бу – бүгүн эрэ күөрэйбит кыһалҕа буолбатах. 2023 сыллаахха оччолорго Матвей Лыткин салайааччылаах куорат Уопсастыбаннай палаатата бу боппуруоһунан киэҥ хабааннаах уопсастыбаннай дьүүллэһиини тэрийэн турар. Мунньах кыттыылаахтара ыарахан уйуктаах тиэхиньикэ сырыытын хааччахтааһыны күүһүрдүү куорат киинигэр ноҕуруусканы аччатыа, массыына сырыытын аҕыйатыа, харгыһы таһаарыа суоҕа этэ диэн санааларын үллэстибиттэрэ.

Бу күннэргэ куорат дьокутааттарыгар «Союз строителей Якутии» СРО генеральнай дириэктэрэ Василий Данилов (Айхал Габышев оннугар анаммыт саҥа салайааччы) тахсан, Олохтоох дьаһалта 73п№-дээх уурааҕыгар уларытыылары киллэрэр наадатын ыйда. Чуолаан 2.2 пууҥҥа «бэс ыйын 1 күнүттэн атырдьах ыйын 31 күнүгэр диэри күнүскү температура 32°С кыраадыһы куоһарар түгэнигэр ыарахан уйуктаах тиэхиньикэ киэһэ 22:00 чаастаан сарсыарда 10:00 чааска эрэ диэри айанныыра көҥүллэнэр» диэн хааччахтааһын онто да суох кылгас тутуу сезонун атахтыырын этэн туран, хааччахтааһынынан хабыллыбатах уулуссаларын сырыыны көҥүллүүргэ этии киллэрбит. Суол инфраструктуратын департаменын салайааччытын солбуйааччы Егор Алексеев маныаха Росдормониторинг тэрилтэттэн көҥүлү ылыы бэрээдэгин быһаарар мунньах ыытыллара наадатын ыйда. Санатар буоллахха, Олохтоох дьаһалта 2020 сыл от ыйын 6 күнүнээҕи 192 №-дээх «Дьокуускай куорат уулусса-суол ситиминэн ыарахан уйуктаах тиэхиньикэ сырыытын тэрийэр туһунан» уурааҕыгар ыарахан уйуктаах тиэхиньикэ уураахха киирбэтэх атын суолларынан сылдьарыгар «Росдормониторинг» ФХТ нөҥүө маршрутун чопчулаан туран сайабылыанньа сурулуннаҕына, ыйыллыбыт маршруту куорат дьаһалтата көҥүллүөн сөп.

(Куорат дууматын пресс-сулууспатын матырыйаалынан)