Сокуоҥҥа уларыйыылар

Федеральнай бүддьүөккэ көннөрүүлэр киирдилэр

2025 с. уонна былааннанар 2026-2027 сс. РФ социальнай-экономическай сайдыытын сорох көрдөрүүлэрин сабаҕалааһыны чопчулааһын түмүгэр 2025 с. федеральнай бүддьүөккэ уларытыылар киирдилэр.

Ол курдук, федеральнай бүддьүөт дохуотун уопсай кээмэйэ 5%-нан аччаан, 36,6 трлн солк. тэҥнэһиэҕэ. Оттон ороскуот уопсай кээмэйэ уларыйыа суоҕа, 42,3 трлн солк. таһымынан хаалыаҕа. Бүддьүөт дефицитэ 5,74 трлн солк. буолуоҕа.   

Олох уйгутун национальнай пуондатын 2025 с. бүтүүтэ сабаҕаланар үбэ-харчыта 12,8 трлн солк. 13,6 трлн солк диэри улаатыа.

*04.11.2025  414 №-дээх «2025 с. уонна былааннанар 2026 уонна 2027 сс. федеральнай бүддьүөт туһунан» федеральнай сокуоҥҥа уларытыылары киллэрии туһунан»
 

Олоҕу-дьаһаҕы хааччыйар ордук суолталаах эбийиэктэри көрүөхтэрэ

Мобилизация резервэтигэр сылдьарга хантараак түһэрсибиттэри олоҕу-дьаһаҕы хааччыйар ордук суолталаах эбийиэктэри араҥаччылааһыҥҥа кытыннарыахтара.

Кинилэр байыаннай хомуурга көрүллэр быраабы, эбээһинэстэри, социальнай мэктиэлээһини, кэмпэнсээссийэлэри туһанар кыахтаныахтара.

*04.11.2025  411 №-дээх «Оборона туһунан» федеральнай сокуон 4-с ыст. уонна «Байыаннай эбээһинэс уонна байыаннай сулууспа» ФЗ 37-с уонна 57-1-кы ыст. уларытыылары киллэрэр туһунан» федеральнай сокуон

Салгын кодексатыгар көннөрүүлэр күүстэригэр киирэллэр

Гражданскай авиация аэродромнарын оператордара судаарыстыбаннай баайы-дуолу куортамнаһыыларын бэрээдэгэ судургутуйда. Ол курдук, дуогабары куонкуруһа уонна аукциона суох түһэрсэр кыах олохтонно. 

*04.11.2025 410 №-дээх  «РФ Салгын кодексатын 49-с ыст. уларытыыны киллэрии туһунан» федеральнай сокуон

Үлэҕэ сыһыаннаах мөккүөргэ босхо юридическай көмө

Судаарыстыбаннай юридическай бюролар уонна адвокаттар гражданнар үлэҕэ ылыыга олоҕо суох аккаастаппыт, үлэҕэ төттөрү киирэргэ, хамнаһы уонна моральнай хоромньуну төлөөбөтөх түбэлтэлэригэр бу дьон интэриэстэрин суукка босхо көмүскүөхтэрэ. 

*04.11.2025  407 №-дээх «Арассыыйа Федерациятыгар босхо юридическай көмө туһунан» федеральнай сокуон 20-с ыст. уларытыылары киллэрии туһунан»

Судаарыстыбаннай оборона сакааһын толорооччуларга нолуок уонна усунуос кэлим төлөбүрүн мораторийа уһатылынна

Судаарыстыбаннай оборона сакааһын толорооччулар 2026 с. ахсынньы 31 күнүгэр диэри хамнаһы туһунан счеттан, биир кэмҥэ нолуок уонна страховой усунуос ааҕыыта суох төлүүр кыахтарын сүтэриэхтэрэ суоҕа.

*04.11.2025 406 №-дээх  «Россия Федерациятын биирдиилээн сокуоннай аакталарыгар уларытыылары киллэрии уонна РФ сокуоннай аакталарын биирдиилээн балаһыанньаларын тохтотуу туһунан» федеральнай сокуон 31-с ыст. уларытыылары киллэрии туһунан»

Экстремизми утары хамыыһыйа быһаарыытын толорбот буолуу иһин ­– ыстараап

Биэдэмистибэ икки ардыларынааҕы экстремизми утары хамыыһыйа быһаарыытын толорбот буолуу иһин административнай эппиэтинэс олохтонно. Маннык быраабы кэһии иһин дуоһунастаах сирэй 30 тыһ. солк. 50 тыһ. солк диэри ыстарааптаныан эбэтэр 1-3 сыл болдьоххо идэтинэн үлэлиирэ тохтотуллуон сөп.

*04.11.2025 404 №-дээх «РФ административнай быраабы кэһии иһин Кодексатыгар уларытыылары киллэрии туһунан»

Тырааныспарга сыһыаннаах тэриллэри маркировкалааһыҥҥа эксперимени ыытыы бэрээдэгэр уларыйыылар

Маркировкаланыахтаах табаардар испииһэктэригэр киирдилэр: туормас диискэлэрэ, холуодакалар, ходовой көлүөһэлэр, диискэлэр (ходовой көлүөһэҕэ сыһыаннаах чаастар).

*РФ Бырабыыталыстыбатын 06.11.2025 1747 №-дээх  «РФ Бырабыыталыстыбатын 2025 с. олунньу 22 күнүнээҕи 202 №-дээх уурааҕар уларытыылары киллэрии туһунан» уурааҕа.

«Парламентская газета» таһаарыытыттан