Социальнай суолталаах сыстыганнаах ыарыылар тула кэпсэттилэр

Бэлиэтээн этэр буоллахха, быйылгы Национальнай кэнгириэс өрөспүүбүлүкэҕэ доруобуйа харыстабыла тэриллибитэ 220 сылыгар ананар.

Конференцияны М.К. Аммосов аатынан ХИФУ уонна СӨ Доруобуйа харыстабылын министиэристибэтэ тэрийэн ыыттылар.

Сыстыганнаах ыарыылар кыһалҕалара куруук тоҕоостоох, билиҥҥи кэмҥэ манна ураты суолта ууруллар. Чуолаан, вируснай гепатит, ВИЧ-инфекция курдук Саха сирин усулуобуйатыгар медицинскэй көмөнү оҥорорго саҥа көрүүнү, сыһыаны ирдиир социальнай суолталаах сыстыганнаах ыарыылар ордук улахан болҕомтоҕо ылылыллаллар.

Александра Золотарева, өрөспүүбүлүкэтээҕи СПИД-ы уонна сыстыганнаах ыарыылары сэрэтэр уонна охсуһар киин кылаабынай бырааһа:

– Конференциябыт аудиторията: инфекционист быраастар, терапевтар, уопсай практика, диагностикалыыр лаборатория быраастара. Бүгүн биһиги хроническай вируснай гепатит, ВИЧ-инфекция курдук социальнай суолталаах сыстыганнаах ыарыылары, вакциналаныы уонна сэрэтэр үлэни ыытыы туһунан ырытыахпыт. Ону тэҥэ ордук кутталлаах менингококковай инфекция тула кэпсэтии буолуо.

Конференциябытыгар кытта, уопуттарын, билиилэрин үллэстэ, Забайкалье, Пермь кыраайдарыттан, Москваттан испэсэлиистэр кэллилэр. Кинилэр сыстыганнаах ыарыыларга ыытар үлэлэрин кэпсиэхтэрэ.

Снежана Слепцова, медицинскэй наука доктора, СӨ Наукаҕа Академиятын академига, ХИФУ медицинскэй институтун сыстыганнаах ыарыыларга, фтизиатрияҕа уонна дерматовенерологияҕа кафедратын сэбиэдиссэйэ, СӨ МЗ кылаабынай штаты таһынан инфекциониһа:

–  Саха Өрөспүүбүлүкэтигэр, кэнники сылларга доруобуйа харыстабылыгар үгүс ситиһии баарын үрдүнэн, сыстыганнаах ыарыыларга сыһыаннаан быһыы-майгы биир тэҥэ суох. Сыстыганнаах ыарыылар уустук балаһыанньаларынан ситимнээн, өрөспүүбүлүкэҕэ инфекционнай балыыһаны тутууну киллэрэн туран, сыстыганнаах ыарыы сулууспатын сайыннарыы холбоһуктаах былаанын түһүмэҕинэн олоххо киллэрии ирдэнэр. С гепатикка сыһыаннаан, нэһилиэнньэни вируснай гепатиттарга скрининнээһиннээх федеральнай бырайыак салгыы үлэлиэ. Быраастары тохтоло суох үөрэтэн, аныгы ньымалары туһанан сэминээрдэри ыытан, сыстыганнаах ыарыыларга каадырдары бэлэмниир тиһиги тупсаран иһэрбит наада.

Өрөспүүбүлүкэтээҕи СПИД-ы уонна сыстыганнаах ыарыылары сэрэтэр уонна охсуһар киин пресс-сулууспатын иһитиннэриитинэн