Социальнай хантараак харчытын сиэбит

1986 сыллааҕы төрүөх дьахтар 2023 сыллаахха Дьокуускайдааҕы социальнай харалта управлениетыттан бэйэ дьыалатын арынарга 350 тыһ. солк. ылбыт. Иистэнэр мастарыскыай үлэлэтиэм диэн социальнай хантараак баттаһан баран үлэлээбэтэх, харчыны бэйэтин наадаларыгар туттан кэбиспит. Ол иһигэр кэргэнин иэһин төлөөбүт.

Дьокуускай куорат суута кинини РФ Холуобунай кодексатын 160 ыст. 3ч.(хищение чужого имущества, вверенного виновному, совершенное в крупном размере) буруйдаабыт. 50 тыһ. солк. ыстараап төлүүргэ уураахтаабыт. Суут бириигэбэри таһаарарыгар дьахтар буруйун билиммитин, силиэстийэҕэ көмөлөспүтүн, туттубут харчытын төннөрбүтүн, үчүгэй характеристикалааҕын учуоттаабыт. Бириигэбэр сокуоннай күүһүгэр киирбит.