Социальнай эйгэ предпринимателлэрэ Грант ылыахтара
Өрөспүүбүлүкэ социальнай эйгэтигэр үлэлиир 50-тан тахса предпринимателэ бэрэсидьиэн Владимир Путин көҕүлээбит «Дьоҕус уонна орто предпринимательство» национальнай бырайыагынан грантовай өйөбүлү ылыахтара. Ол туһунан Арассыыйа информационнай агентствота иһитиннэрдэ.
«Барыта 60 сайаапка киирдэ, куонкурус түмүгүнэн уопсайа 23,2 мөл. солк. тахса суумалаах субсидиялары социальнай эйгэҕэ үлэлиир 54 предприниматель ылыаҕа», — диэн агентство суруналыыстарыгар регионнааҕы предпринимательствоҕа, атыыга уонна туризмҥа Министиэристибэтигэр кэпсээбиттэр.
Сайаапкалар Саха сирин тоҕус оройуонуттан киирбиттэр, ол иһигэр арктическайдартан. Өйөбүл кээмэйэ 140 тыһыынчаттан 1 мөл. солк. тиийэр.
«Итинник грантовай өйөбүл быйыл бастакы төгүлүн оҥоһуллар. Сайаапкалары сүүмэрдээһиҥҥэ реестрга булгуччу ФНС сайтыгар баар социальнай тэрилтэ ирдэнэр, ону таһынан бизнес-былаан хаачыстыбата уонна көрдөрүүтэ учуоттанар», — диэн Министиэристибэҕэ бэлиэтээбиттэр.
Саха сирин социальнай тэрилтэлэрин реестригэр 2021 сылга 113 дьоҕус уонна орто бизнес субъектара киирбиттэр.