Социальнай эбийиэктэри тутуу хаамыытын бэрэбиэркэлииллэр

Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников өрөспүүбүлүкэ киин куоратын социальнай тутууларыгар оробуочай сырыытын түмүгүн туһунан иһитиннэрдэ.

253 миэстэлээх 1 №-дээх оскуола тутуутун былаһааккатыгар үлэ салҕанар – дьиэ хайыы-үйэ төрдүс мэндиэмэҥҥэ диэри тутуллубут, уопсай бэлэмэ 52% буолар. Үлэ график быһыытынан барар эрээри, бэдэрээтчити абаансалааһыҥҥа кыһалҕа баар. «Өрөспүүбүлүкэ Ил Дарханын сорудаҕынан биһиги бу боппуруоһу ырытан көрөбүт, туруктаах үбүлээһини хааччыйар туһугар», – диэн Садовников бэлиэтээтэ.

«Спортивнай» саҥа түөлбэҕэ элбэх өҥөнү оҥорор спорт саалата тутуллар. Билигин котлованы бэлэмниир үлэ, щебенканы тэлгэтии уонна сойутар систиэмэни таҥыы ыытыллар. Инженернэй ситимнэргэ холбонор тэхиньиичэскэй боппуруостар быһаарыллыбыттар. Модульнай хочуолунайы тутууга хантараак түһэрсиитэ бүддьүөттэн 20% кэмчилииргэ төһүү буолбут. Эбийиэги үбүнэн хааччыйыы боппуруостарын кэлэр нэдиэлэҕэ  бүтэһиктээхтик быһаарыахтара.

Маны таһынан «Спортивнай» дьоҕус оройуоҥҥа 240 миэстэлээх уһуйаан тутуута түмүктэнэн эрэр, билигин ис бараанын оҥороллор. Эбийиэк бэлэмэ 73%. «Бэдэрээтчит эппиэтинэстээхтик үлэлиир уонна үлэтин болдьоҕор туттарарга эрэллээх», – диэн Садовников бэлиэтээтэ.

Sakhaday.ru саайтан

Хаартыска: yakutskcity.ru