Социальнай эбийиэктэр эр-биир үлэҕэ киирэн иһиэхтэрэ

Бэҕэһээ Ил Дархан Айсен Николаев киин куоракка тутуллар социальнай эбийиэктэри тутуу хаамыытын билистэ.

Көһө сылдьар мунньахха Бырабыыталыстыба Бэрэссэдээтэлин бастакы солбуйааччы Дмитрий Садовников, тутуу миниистирэ Виктор Романов, ОДьКХ уонна энергетика миниистирэ Вячеслав Емельянов, экономика миниистирэ Петр Попов, куорат баһылыга Евгений Григорьев кыттыыны ылбыттара.

Салалта бастатан туран куорат «Звезднай» түөлбэтигэр тутуллар 990 миэстэлээх оскуоланы уонна элбэх кыбартыыралаах дьиэлэри, 7 №-дээх водоузелы көрдө. Бүгүҥҥү күҥҥэ «Звезднай» түөлбэҕэ «Водоканал» АУо өҥөтүнэн 2377 киһи туһанара бэлиэтэннэ.

Иккис эбийиэгинэн Сэргэлээх шоссетыгар тутуллар Үөрэх адаптивнай комплекса буолла. Манна 150 миэстэлээх интэринээт уонна 200 миэстэлээх уһуйаан тутулла тураллар. Доруобуйаларынан хааччахтаах оҕолор үөрэнэллэригэр анаммыт комплекс 1-кы уочарата – 550 миэстэлээх оскуола – бу күһүн үлэҕэ киирбитэ. Комплекс СӨ Бырабыыталыстыбата уонна «ПроШкола» хампаанньа түһэрсибит концессионнай сөбүлэҥнэрин чэрчитинэн ыытыллар.

Үһүс эбийиэгинэн Сайсары уокуругар Билибин уул., 17 тутуллубут 141 кыбартыыралаах чэпчэки куортамнаах дьиэ буолла. «Уһук Илиҥҥэ чэпчэки сыанаҕа куортамнанар дьиэ» бырагырааманан бастакы 24 кыбартыыра 2024 сылга үлэҕэ киирбитэ. Федеральнай киин уонна өрөспүүбүлүкэ бырабыыталыстыбатын өйөбүллэринэн куортам ыйдааҕы төлөбүрүн кээмэйэ ортотунан 12 тыһ. солк. курдук. Кэлэр 2026 сылга эбии 283 кыбартыыраны үлэҕэ киллэрэр былааннанар.

Ахсынньы 13 күнүгэр Ил Дархан баһылыктаах хамыыһыйа манна дьиэ ылбыт Ивановтарга сырытта. Куорат баһылыга Евгений Григорьев бэлиэтээбитинэн, чэпчэки куортамнаах дьиэлэри тутуу эдэр исписэлиистэри, анал байыаннай дьайыы кыттыылаахтарын, элбэх оҕолоохтору олорор дьиэнэн хааччыйарга улахан көмөлөөх.

Санатар буоллахха, Сэргэлээх суолун 12 км тутуллар Адаптивнай үөрэхтээһин комплексын уһуйаана, Саҥа тутуллубут «Звезднай» түөлбэҕэ 315 миэстэлээх уһуйаан уонна 990 миэстэлээх оскуола, Ленин проспегар 1 №-дээх оскуола саҥа дьиэтэ, Пирогов уулуссатыгар 4 №-дээх анал коррекционнай оскуола дьиэтэ уонна икки спорт оскуолата бары 2026 сылга үлэҕэ киириэхтэрэ.

Маны таһынан Эпос уонна искусство Арктикатааҕы киинэ үлэҕэ киирэр болдьоҕо эмиэ 2026 сылга көспүтэ. Ол төрүөтүнэн дизайн-бырайыакка уларытыылар киирбиттэрэ буолбута.