Снайпинг, көҥүл тустуу, мас тардыһыы күрэхтэһиилэрэ буолуохтара

Ол туһунан спорт миниистирэ Леонид Спиридонов “Якутия 24” ханаал биэриитигэр кэпсээтэ.

Алтынньы 9-11күннэригэр Сэбиэскэй Сойуус дьоруойа Федор Охлопков аатынан снайпинг турнира ыытыллыаҕа. Турнир төрдүс төгүлүн ыытыллар. Тас дойдулартан уонна Арассыыйа араас регионнарыттан кыттааччылар кэлэллэрэ былааннанар.

Сэтинньигэ улуу тренер Дмитрий Петрович Коркин кэриэһигэр көҥүл тустуу турнира быйыл саха олимпиецтара Павел Пинигин, Роман Дмитриев, Александр Иванов Олимп чыпчаалыгар тахсыбыт өрөгөйдөрүн 50 сылыгар ананыаҕа.

Аан дойду таһымнаах мас тардыһыы чемпионата сэтинньи 26-30 күннэригэр Казань куоракка ыытыллыаҕа. Ону таһынан Мас тардыһыытын федерацията тэриллибитэ 30 сылыгар аналлаах кубок ахсынньы 5 күнүгэр буолуоҕа – аан дойду араас дойдуларыттан кыттааччылар кэлэллэрэ күүтүллэр.