SMS сэрэхтэммит

Бу сылга киирэн баран дойду үрдүнэн SMS ыытан түөкүннээһин кээмэйэ 54% үрдээбит. Урут төлөпүөнүнэн эрийэн үктэтэр буоллахтарына, билигин, суһал дьаһалы ирдиир ис хоһоонноох иһитиннэриини ыытан, дьон түөкүттэргэ бэйэлэрэ эрийэллэрин курдук дьаһаммыттар. Холобур, мобильнай провайдер аатыттан «Вам подключена новая платная услуга» диэбит курдук ис хоһоонноох SMS ыыталлар. Араартарарга анаммыт нүөмэр баар буолар. Кими эрэ «Вам начислен бонус 500 рублей за лояльность, подтвердите получение» диэн иһитиннэриинэн манчыыктаан ылаллар. Эрийдэххэ, «код кэлиэҕэ, ону эт» диэхтэрэ.
Арай «Уважаемый абонент! На Ваш номер подключена новая услуга «Премиум ТВ+». Стоимость – 35 рублей в день». Чтобы отключить, позвоните по номеру 8-800... » SMS тигинээн кэлэр. Киһи эрэ итэҕэйиэх курдук дии? Олох эрийимэҥ! Эрийдигит да, коду ыйытыахтара.
Төлөпүөҥҥэ хачайданар мобильнай провайдер сыһыарыытыгар туох өҥө киирэ сылдьара, туохха төһөнү төлүүргүт барыта сурулла сылдьар эбээт. Эрэйэ суох ону киирэн көрүҥ.