«Сказки Туймаады» Арассыыйа сэртипикээтинэн бэлиэтэммит

Дьокуускайдааҕы килиэп кэмбинээтэ оҥорон таһаарар «Сказки Туймаады» сакалаат кэмпиэтэ быйыл «Сделано в России» сэртипикээтинэн бэлиэтэммит.
«Сделано в России» диэн сэртипикээт Саха сирин оҥорон таһаарааччыларын бородууксуйалара Арассыыйаҕа билиниллэр хаачыстыба стандартыгар толору хоруйдуурун туоһута. 
Манна даҕатан бэлиэтээтэххэ, Дьокуускайдааҕы килиэп кэмбинээтэ өрөспүүбүлэкэ тэрилтэлэриттэн бастакынан дойду баһылыга Владимир Путин көҕүлээбит «Эффективная и конкурентная экономика» нацбырайыак «Производительность труда» көҕүлээһинин чэрчитинэн федеральнай киини кытта киэҥ хабааннаах өйөбүл туһунан сөбүлэһиини түһэрсибитэ. Сөбүлэһии услуобуйатынан, кэмбинээт үлэ оҥорон таһаарыытын сыллата 10 % үрдэтэр эбээһинэһи ылыммыт. Тэрилтэ генеральный дириэктэрэ Светлана Кынакытова бэлиэтииринэн, бу бырайыакка кыттыы оҥорон таһаарыы кээмэйин даҕаны, хаачыстыбатын даҕаны үрдэтэр кыаҕы биэрбит. Ол курдук, 2023 сылтан тэрилтэ биир килиэби урукку 2 чаас оннугар 1,5 чаас иһинэн буһаран таһаарар кыахха тахсыбыт, «5S» систиэмэ көмөтүнэн үлэ көдьүүһэ да улааппыт, ороскуот кээмэйэ да намтаабыт. 
Дьокуускайдааҕы килиэп кэмбинээтэ бүгүҥҥү күҥҥэ 180 суол араас бородууксуйаны оҥорон таһаарар, 17 тус маҕаһыыннаах, диэн Ил Дархан уонна Бырабыыталыстыба пресс-сулууспата иһитиннэрэр.

Хаартыска: https://ysia.ru/yakutskie-konfety-skazki-tujmaady-poluchili-prestizhnyj-sertifikat-sdelano-v-rossii/