«Ситим» сойуус үүнэр 2026 сылы уруйдуу көрсөр

Ааһан эрэ сыл түмүктэрин таһаарар, кэлэр сылы торумнуур бэлиэ тэрээһин Петр Кычкин-Сайылык Бүөтүрүн алгыһынан, сойууска саҥа киирбит Прасковья Обутова-Барыскыай «Таал-Таал эмээхсин» остуоруйанан «Ээл-Мээл» диэн бэрт интэриэһинэй, көрүдьүөс, үөрэтэр ис хоһоонноох туруоруутунан саҕаланна.

Саҥа дьыл бырааһынньыгын дьоро киэһэтэ маскараата суох буолбата. Айар-тутар дьон маскараатын да тиэмэтэ уратытынан, ураннаан-мындырдаан да оҥостубуттарынан сөхтөрдө. Ол курдук, «Айар Иэйии ата” маскараат ааптара Маайа Сиэнэ, «Саха ата” – хаһаайына Тапталаана, сыл бэлиэтэ – «Кыһыл ат” хаһаайына Николай Кондратьев биир эйгэлээхтэрин хайҕалын ылыахтарын ыллылар. Бу киэһэ сценкаҕа оонньообут артыыстар, маскараат оҥостубуттар бары тоҥ аһынан, кууллаах собонон бириис тутан дуоһуйдулар.

Ырыалаах-тойуктаах кэнсиэр кэнниттэн Сергей Афанасьевич Сергеев-Сэгэй, «Ситим» көҥүл суруйааччылар сойуустарын толорооччу дириэктэрэ ситиһиилээхтик үлэлээбит дьоҥҥо Махтал суруктары туттарда уонна сыллааҕы оччуотун билиһиннэрдэ.

Сүрүнүн кэпсээтэхххэ, сойууспут ытык кырдьаҕаһа Виталий Григорьевич Николаев «Былыргы саха атыыһыттарра” историческай кинигэни Галина Гаврильевна Иванова диэн кырдьаҕас учууталы кытары куолаан таһаардылар. Бу кинигэ оскуолаҕа эбии үөрэхтээһиҥҥэ да туттарга үчүгэй матырыйаал.

Сойууспут сүрүн салайааччыта, тутаах киһибит Иван Парфеньевич Александров анал байыаннай дьайыыга сыһыаннаах хас да кинигэни суруйан таһаарбытыттан биирэ – нууччалыы, биирэ английскайдыы тылбаастанан таҕыстылар. Тылбааһы Эдьигээҥҥэ олорор  английскай тыл учуутала Агафья Николаевна Шадрина оҥорбут. Петр Федотович Кобельянов «Саха былыргы күүстээхтэрэ” диэн хомуурунньукка үлэлэһэ сылдьар.

Сүрүн сүбэһиппит, ытык кырдьаҕаспыт, сойууспут тэриллиэҕиттэн тиһигин быспакка үлэлии-хамныы сылдьар Анна Петровна Григорьева үлэбитин хаһыаттарга билиһиннэрэ олорор. Кыайыы 80 сылынан «Ытык Ильмень» диэн бырайыага Рутуб ханаалыгар киирдэ. Манна Ыстапаан Таастаах уонна Виталий Григорьевич үлэлэстилэр.

Евдокия Николаевна Уварова-Чуохаана салайааччылаах сойууспут Амматааҕы түмсүүтэ бэйэлэрэ суруйбут остуоруйаларын хомуурунньугун таһаараары сылдьаллар. Светлана Афанасьевна Андреева-Маайа Сиэнэ «Тапталым кынатын көннөрөн» хоһоон хомуурунньугун таһааттарда. Бэйэтин хоһоонноругар хас да ырыа ааптара. Анна Степановна Хабарова-Айталы хомуурунньугу кытта түөрт кинигэтэ бэчээккэ таҕыста. Ону таһынан «Быралыйа Буура бухатыыр сыдьааннара” олоҥхото бэчээккэ тахсаары сытар. Хоһоонноро «Киин куорат” уонна дойдутун хаһыаттарыгар бэчээттэннилэр, ырыа буоланнар дьон дьүүлүгэр тахсаллар. Олоҥхо кинигэлэрэ оскуолаҕа, уһуйааннарга Маҥыраска, Хачыкаакка, куоракка, хоту дойдутугар тарҕаннылар. Намҥа олорор сиригэр литературнай күрэхтэргэ, мероприятияларга кыттар. Аны олоҥхо кинигэтин биһирэмин кэтэһэбит.

Сандаар Күн Сандаара – «Ситим» Чурапчы улууһун филиалын салайааччыта, сойууспут иһинэн барар тэрээһиннэри «Далбар хотун», «Киин куорат», «Саҥа олох» саайтарыгар сырдатар. Бэйэтин хоһоонноро «Якутянка» бырайыакка уонна «Киин куорат» хаһыатыгар таҕыстылар. Үс төгүл Чурапчы салаатын аатыттан бэйэ суруйбут хоһоон күрэһин тэрийэн ыытта. Кыргыттары кытта Рутуб ханаалы арыйдылар. «Күһүн вальска ыҥырда» хоһооно Намчы дьүрүлүгэр, толоруутугар «Тэтим» араадьыйаҕа сүрэхтэннэ.

Вера Афанасьевна Санникова-Мичийээнэ «Палитра души» кинигэтэ нууччалыы тылбаастанан киэҥ эйгэҕэ таҕыста, “Үрүҥ  хаар  алгыһа” аан дойдутааҕы бэстибээлгэ кэлбит омук суруйааччыларыгар бэлэх уунна.

Бу күннэргэ 65 үбүлүөйдээх сааһын бэлиэтээбит Степан Егорович Кожуров-Таастаах Ыстапаан «Тыа сирэ айар киһи хараҕынан» диэн Прокопий Хабаров биэриитигэр тахсан, истээччи сэҥээриитин ылла.

«Ситим» быйылгы айар сезонун бу курдук сэргэхтик, таһаарыылаахтык түмүктээн, 2026 сылы уруйдуу көрсөр.