Сир кодексатын саҥа ирдэбиллэрэ

2025 с. сүрүн уларыйыыта – регистрацияны оҥорторорго учаастак кыраныыссатын хайаан да быһаартарыы. Сокуон саҥа көннөрүүтүнэн, учаастак атыыланар, бэлэхтэнэр эбэтэр нэһилиэстибэнэн бэриллэр түгэнигэр, кыраныысса быысаһыыта (межеваниета) оҥоһуллубатах буоллаҕына, маннык эбийиэги регистрациялыыртан аккаастыыллара буолар.

Ону сэргэ 2025 с. кулун тутар 1 күнүттэн сири бас билээччилэртэн учаастагы үс сыл иһигэр туһаҕа таһаарары, баһылыыры ирдиир саҥа сокуон киирбитэ. Сири туһаҕа таһаарыыга туһаныы көҥүллэммит көрүҥҥэ сөп түбэһэрэ эмиэ киирсэр. 2025 с. кулун тутар 1 күнүн кэннэ ылыллыбыт эбэтэр бэлэхтэммит учаастактарга сири баһылааһын болдьоҕо бас билии регистрацияламмыт кэмиттэн ааҕыллар. Оттон бу иннинэ номнуо бас билиигэ ылыллыбыт учаастактары баһылааһын үс сыллаах болдьоҕо 2025 с. кулун тутар 1 күнүттэн ааҕыллар.

Тутууну ыытарга аналлаах учаастактарга сири баһылааһын үс сыллаах болдьоҕун кэннэ тутууну ыытан регистрациялыырыгар 5 сыл бэриллэр.

Сокуон ирдэбилэ даачалаахтарга эмиэ сыһыаннаах: өскөтүн учаастак көҥүллэммит көрүҥүнэн туһаныллар, саады үүннэриигэ (садоводство) анаммыт да буоллаҕына, бу сири баһылааһыҥҥа ирдэбил син биир эрэйиллэр. Быйыл кулун тутар 1 күнүттэн «О ведении гражданами садоводства и огородничества для собственных нужд и о внесении изменений в отдельные законодательные акты Российской Федерации» 217-с №-дээх федеральнай сокуоҥҥа киллэриллибит уларытыылар күүстэригэр киирбиттэрэ. Чуолаан сокуон 5-с чааһыгар чопчуланарынан, саад уонна оҕуруот сирдэрин баһылааһыҥҥа, ханнык көрүҥ сиргэ киирсэллэриттэн тутулуга суох, РФ Сир кодексатыгар көрүллэр нэһилиэнньэлээх пууннар кыраныыссаларыгар баар учаастактары баһылааһын балаһыанньата туттуллар. Саад уонна оҕуруот сирин учаастактарын баһылааһыҥҥа ыытыллар тэрээһиннэр испииһэктэрин уонна маннык сир учаастактара туһаныллыбат сибикилэрин быһаарыыны РФ Бырабыыталыстыбата олохтуур. 

Бу туһунан Дьокуускай уокуруктааҕы дьаһалтатын пресс-сулууспата иһитиннэрэр.

Сир учаастактарыгар быраап эрэсиимэ

Сир учаастактарыгар быраап эрэсиимэ куораты тутуу регламенынан быһаарыллар.

«Дьокуускай куорат» куорат уокуругун сиригэр-уотугар оннук докумуонунан Дьокуускай куорат Дууматын 25.12.2013 с. 169-НПА №-дээх «Правила землепользования и застройки городского округа «город Якутск» нормативнай быраап аактата буолар.

Сири туһаныы уонна тутууну ыытыы быраабылалара

«Дьокуускай куорат» уокуругар сири туһаныы уонна тутууну ыытыы быраабылалара Дьокуускай сиригэр-уотугар куораты тутууну тэрийии быраабын төрүтүгэр олоҕураллар.

Быраабылалары бигэргэтии уонна уларытыылары киллэрии РФ куораты тутууга кодексатын бэрээдэгинэн олохтоох бэйэни салайыныы боломуочуйалаах уорганын быһаарыытынан оҥоһуллар.

*Дьокуускай куорат Дууматын 25.12.2013 с. 169-НПА №-дээх нормативнай правовой аактата.

Тугу өйдүүр нааданый

Докумуоннар сокуон ирдэбилигэр сөп түбэспэттэрэ маннык содуллары үөскэтэр:

- хамсаабат баай-дуол эбийиэгин судаарыстыбаннай регистрациялааһынтан аккаас;

- былааннанар чааһынай олорор дьиэни тутуу туһунан иһитиннэриигэ аккаас.

Дьокуускайдааҕы «Cир сыһыаннаһыыларыгар ааҕыныстыба» МКУ иһитиннэриитинэн.

Дьокуускай олохтоохторугар сири туһаныы уонна тутууну ыытыы быраабылалара

Сири бас билээччи учаастагар дьиэни, атын да тутууну ыытар бырааптаах, өскөтүн бу быраабылалары тутуһар буоллаҕына:

· сир учаастагын быраап эрэсиимин;

· куораты тутуу быраабылатын;

· тэхиньиичэскэй регламеннар ирдэбиллэрин;

· экология ирдэбилин;

· санитарнай-гигиеническэй быраабылалары уонна нуормалары;

· сокуон көрөр баһаарынай куттал суох буолуутун уонна атын ирдэбиллэрин.

Сокуонунан олохтоммут ирдэбиллэри кэһэн туран тутууну оҥорон, тутан таһаарыы көҥүлэ суох тутуунан көрүллүөн сөп.

*РФ гражданскай кодексатын 260 ыст. 2 п., 263 ыст. 1 п., 222 ыст. 1 п.

Тыа хаһаайыстыбатыгар туһанарга анаммыт сир учаастагар олорор дьиэни туттууну бобуу туһунан

«Дьокуускай куорат» куорат уокуругун сиригэр-уотугар көҥүллэммэт:

Бааһынай (фермерскэй) хаһаайыстыба үлэтин ыытар тыа хаһаайыстыбатыгар анаммыт сирдэригэр олорор дьиэни тутуу, реконструкциялааһын, тутан туһаныы (эксплуатация)

*СӨ 26.04.2016 с.  «Саха Өрөспүүбүлүкэтигэр тыа хаһаайыстыбатын сайыннарыы туһунан»  1619-2 791-V №-дээх сокуонун 19.1 ыст.