Сир аһын хомуйуу бэрээдэктэниэҕэ

Ил Түмэн дьокутааттара «СӨ тыа хаһаайыстыбатын сайыннарыы» сокуоҥҥа аска туттуллар үүнээйилэри хомуйуу уонна туһаҕа таһаарыы чааһыгар уларытыылары киллэрии саҥа үлэ миэстэлэрин таһаарар уонна тыа дьоно эбии дохуоттаналларыгар тирэх буолар кыахтаах диэн санаалаахтар.
Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ Александр Атласов бэлиэтииринэн, уларытыылары киллэрии уонна маннык көрүҥнээх экономическай дьарыгы тыа хаһаайыстыбатын салаатыгар сыһыарыы тыа сирин олохтоохторугар дьоҕус урбаанынан барыстаахтык дьарыктанар уонна судаарыстыба өйөбүлүнэн туһанар кыаҕы биэриэн сөп. 
Учуонайдар аахпыттарынан, Саха сирин ойуурдарыгар 59 көрүҥ отонноох үүнээйи уонна 80-тан итэҕэһэ суох тэллэй арааһа үүнэр. Маны сэргэ 379 көрүҥ аһылыкка туттуллар уонна 537 араас эмтээх от үүнэр. 
Ол эрээри ырыынак бу көрүҥэ ситэтэ суох тэриллэн турар. Александр Атласов этэринэн, манан сиэттэрэн, тыа хаһаайыстыбатын бородууксуйатын таҥастааһыҥҥа, батарыыга потребительскай кооперация оруолун бэлиэтээн туран,  өрөспүүбүлүкэ тыатын хаһаайыстыбатын потребительскай кооперациятын сайыннарыы туһунан сокуон барылын көрөр. 
«2025 сыл бүтүөр лиэри Айсен Николаев дьаһалынан 13 хоту улууска барыларыгар эргиэн-логистика кииннэрэ тутуллан бүтүөхтээхтэр. Бу кииннэр базаларыгар соҕотуопка, харайыы уонна тиэйии пууннара тэриллиэхтээхтэр», - диэн бэлиэтиир дьокутаат. Ол туһунан «Парламентская газета» иһитиннэрэр.

Хаартыска: Василий Кононов