SIM-картаны туттууга саҥа сокуон

Инньэ гынан оператордар картаны туһанааччы, дуогабарын тохтоппотоҕун да үрдүнэн, олохтоммут лимити таһынан ылбыт SIM-карталарын блокировкалаатылар. Маны таһынан туора дьоҥҥо бэйэ аатыгар SIM-картаны ылан биэрии иһин ыстараап олохтонно. Манна чугас аймахтарга (төрөппүттэргэ, кэргэҥҥэ, оҕоҕо) ылан биэрии киирсибэт. Бу сокуон элбэх мобильнай нүөмэри туһанан түөкүннээһини утарар соруктаах ылыллыбыт. 

SIM-картаны бэйэ аатыгар сокуоннайа суох туора киһиэхэ ылан биэрии иһин ыстараап кээмэйдэрэ:
Физическэй сирэйгэ: 30 000-тан 50 000 солк. диэри.

Юридическай сирэйгэ уонна ИП-га: 100 000-тан 200 000 солк. диэри. 

Маны таһынан бу күннэргэ норуоттар икки ардыларынааҕы роумиҥҥа холбоно сылдьыбыт карталары уонна 72 чаас устата арахса сылдьыбыт симкалары 24 чаас «тоҥоруу» (мобильнай интэриниэти, СМС ыытыыны-тутууну тохтотуу) туһунан сокуону ылынары былаанныыллар диэн  «Коммерсант» хаһыат суруйда. Онно этиллэринэн, блокировкалааһын мэхэньиисимэ маннык буолуон сөп: блокировкаламмыт абонеҥҥа бэрэбиэркэлиир капчаҕа (робот буолбатаххын бигэргэтэр тургутук) киллэрэр сигэлээх СМС иһитиннэрии кэлэр, бэрэбиэркэни аастахха сибээс өҥөтө чөлүгэр түһэр. Ол эрээри бу мэхэньиисими олоххо киллэрии оператордарга тэхиньиичэскэй өттүнэн уустуктардаах буолуон сөбүн ыйаллар. Эрдэ пилота суох көтөр аппарааттары сокуоннайа суох туһаныыны утарар соруктаах манна хабааннаах миэрэлэр РФ сиригэр үлэлиир атын дойду SIM-карталарыгар сыһыаннаан ылыллыбыттара. Онно «тоҥоруллубут» карталар ыйыллыбыт кэмҥэ үлэлээн саҕалыыллара тэхиньиичэскэй өттүнэн уустуктары көрсүбүтүн «Коммерсант» тустаах таһаарыытыгар бэлиэтиир.