Сиэргэ баппат ыар быһыы

Дьокуускай куорат Клара Цеткин аатынан уулуссатыгар турар дьиэ биир кыбартыыратыгар ыам ыйын 26 күнүн сарсыардатыгар умайыы тахсан, 1975 сыллаах төрүөх киһи суорума суолламмытын, иккис эмсэҕэлээччи – 1981 с.т. киһи угарнай гаастан өйүн сүтэрэн,  икки илиитин уокка сиэтэн, ыарахан туруктаах балыыһаҕа киирбитин сырдатан турабыт. Киһи кэлэйиэх, бу ыарахан түбэлтэ соруйан уоттааһынтан тахсыбыт.

Сэлиэстийэлиир кэмитиэт өрөспүүбүлүкэтээҕи управлениета иһитиннэрбитинэн, 51 саастаах холуочук киһи анараа дьону кытта тыл-тылга киирсибэккэ, кыыһырсыбыттар. Дьоно утуйбуттарын кэннэ, соруйан, ыйанан турар таҥаһы уоттаан баран, атахха биллэрбит. Бу сиэргэ баппат дьиикэй быһыытын иһин, киниэхэ УК 105 ыстатыйатын 2 чааһын е пуунунан холуобунай дьыала көбүтүллүбүт.  Ол эбэтэр, элбэх киһи олоҕор кутталлаах ньыманан киһини өлөрүү иһин ыстатыйанан эппиэттиэҕэ. Уорбаланааччы, хата, тутуллубут.