“Сибойл” заправкаларыгар бэнсиин атыыта тохтоото

 “Сибойл” тэрилтэ салайааччыта бэнсиин атыытын тохтотор туһунан бирикээһин ойуута бассаап* (РФга бобуулаах Мета хампаанньа социальнай ситимэ) ситимигэр бэрт түргэнник тилийэ көппүтэ. Оччолооҕу көрөн, уордайбыт, абарбыт, "баҕар, сымыйа буолуо" дии санаабыт үгүс буолуохтаах. Тимир көлөлөөх, бэнсииҥҥэ наадыйааччы элбэҕэ сыттаҕа.

Онон Дириэктэр Сергей Черных Саха сиринээҕи Суһал штабка туох диэн быһаарбытын сэргиэххит дии саныыбыт:

“Биһиги сотору кэминэн бэнсиин саҥа баартыйата кэлэрин күүтэбит. Эбии уматык кэлиэ эрэ кэрэх, бэнсиин атыытын,  бары массыыналарга, олоҕурбут үгэһинэн, саҕалыахпыт”.

Манна даҕатан эттэххэ, “Сибойл” заправкалара Дьокуускайга, Хаҥаласка, Мэҥэ Хаҥаласка түстэнэн үлэлииллэр, хомойуох иһин, хайаларыгар да субу бүгүҥҥү туругунан бэнсиин атыыта бобуллан турар.

*Арай уматык ( топливной)  каарталаахтарга эрэ куталлар. Ону тэҥэ диисэл уматыга хааччаҕа суох атыыланар.

Сергей Черных маннык эрэ дьаһанан, нэһилиэнньэҕэ атыыны тохтотон, туох хайа иннинэ муниципальнай тэрилтэлэри, тыа хаһаайыстыбатын  табаары оҥорооччуларын, доруобуйа харыстыбатын тэрилтэлэрин, саахалы туоратар, суһал көмөнү оҥорор сулууспалары бэнсиининэн хааччыйар кыахтаахтарын быһаарбыт.

Этэр эттэҕинэ, эмиэ да сөп. Холобур, доруобуйа харыстабылын тэрилтэлэрин тимир көлөтө уматыктаах буолуутуттан дьон олоҕо тутулуктанар, муниципальнай тырааныспар тохтоотоҕуна, үлэҕэ-үөрэххэ кэлии-барыы сырыыптанара чуолкай. Онон, доҕоттор, тулуйа түһэргэ тиийэбит.