Сибэккинэн симэннилэр, сайыммытын киэргэттилэр
3335 сибэкки = 75 кв. миэтэрэ
Доҕордоһуу болуоссата сайын аайы сиэдэрэй сибэккинэн симэнэр, куорат олохтоохторун уонна ыалдьыттарын кэрэ көстүүнэн үөрдэр. Быйыл манна петуния хас да көрүҥэ, бархатцы, колеус, никандра уо.д.а. дьэрэкээн сибэккилэр самаан сайыммытын киэргэттилэр.
Октябрьскай уокурук управатын исписэлииһэ Константин Иванович Румянцев иһитиннэрбитинэн, быйыл Доҕордоһуу болуоссатыгар, ону таһынан «Илин Эҥэр» маҕаһыын уонна академик Владимир Ларионов аатынан сквер икки ардыларынааҕы территорияҕа барыта 3335 сибэкки (75 кв. миэтэрэ) олордуллубут.
Бэдэрээтчит – ИП Захаров Николай Алексеевич. Муниципальнай хантараакка олоҕуран, бэс ыйын 10 күнүгэр диэри олордуу үлэтэ ыытыллыбыт, онтон балаҕан ыйын 15 күнүгэр диэри бэдэрээтчит күн аайы бүөбэйдиэхтээх, көрүөхтээх-харайыахтаах эбит. Дьэ, ол кэннэ хомуйуохтаах, конструкцияларын көтүрүөхтээх.
Чахчы, искусство храма!
Быйыл сайын Суорун Омоллоон аатынан Опера уонна балет тыйаатырын иннэ хараҕы манньытар кэрэ чэчиктэринэн чэлгийдэ. Искусство храмыгар кэлбит ыалдьыты дьэрэкээн сибэккилэр үктэлтэн уруйдуу көрсөллөрө көрүөххэ астык!
Хаартыскалар: Ааптар түһэриилэрэ
Сонуннар
Ордук ааҕаллар
