Сибэккилээн бүппүт бархатцыны туһаҕа таһаарар 8 ньыма

«Киин куорат» сүбэлэрин чугас дьоҥҥутугар тарҕатыҥ:

1-кы ньыма. Сибэккилээн бүппүт бархатцылары силистиин түөрэн ылан, кирээдэлэргэ тарҕатабыт уонна 20-30 см дириҥ гына көмөн кэбиһэбит. Чуолаан моркуоп, хаппыыста, чеснок, клубника, луук уонна помидор кирээдэлэригэр. Ол курдук, помидору, биэрэһи, баклажаны фузариоз курдук ыарыыттан, түүнүгүрүүттэн харыстыыр; луук, чеснок, клубника буорун араас ыарыылартан сэрэтэр, луук сахсырҕатын куоттарар. Ол эрээри бобовайдары (горуох, фасоль) олордорго анаммыт кирээдэлэргэ кутумаҥ диэн уопуттаах оҕуруотчуттар сүбэлииллэр.

2-с ньыма. Бэйэтинэн эбэтэр бытарытан баран кыстыыр үүнээйилэри үллүйэр «суорҕан» оҥоруохха сөп. Тымныыттан хаххалыыр, хаары тутар, хатан сыттаах буолан, кэрбээччилэри (кутуйахтары) чугаһаппат, сыыйа буорга уоҕурдуу быһыытынан иҥэр.

3-с ньыма. Отонноох мастарга эбэтэр талахтарга мульча быһыытынан туттуллар. Араҥата 4-6 см кырата суох буолуохтаах. Силистэрин тоҥорууттан харыстыыр, сыыс от үүнэрин бохсор.

4-с ньыма. Күһүн хомуур саҕана силиһин түөрбэттэр, сир анныгар хааллараллар. Туһалаах микроэлеменнэр суураллыбаттарыгар көмөлөһөр, сииги, салгыны аһардыыны үрдэтэр.

5-с ньыма. Бархатцылары бытарытан баран, компоска бырахтахха, органическай тобохтор сытыйыыларын түргэтэтэр.

6-с ньыма. Сиэмэлэрин хомуйан ылан, аны сааскыга диэри кураанах сиргэ ууран кэбиһэбит.

7-с ньыма. Норуот медицинатыгар киэҥник тутталлар. Сибэккилэрин хатаран баран чэй, ностуой оҥостуохха сөп, иммунитеты бөҕөргөтөргө, тумууга туһалыыр. Хат эбэтэр оҕо эмтэрэр дьахталлар, 2-лэригэр диэри саастаах кырачааннар иһэллэрэ көҥүллэммэт.

8-с ньыма. Бархатцы эминньэхтэрин хатаран баран, таҥас мөһөөччүктэргэ угаттаан, ыскаап иһин эбэтэр атах таҥастарын сытын тупсарар ароматизатор оҥостуохха сөп.

Болҕойуҥ! Ыалдьыбыт, сытыйбыт, түүнүгүрбүт, ол-бу бээтинэлээх сибэккилэри тута быраҕыҥ. Аллергиялаах дьон тумналлара ордук.