Сибэкки тиллибит кистэлэҥэ

Ийэ уолун хоһугар түннүккэ икки сибэккини киллэрэн уурбут.

– Уута кутаар, оччоҕуна эйигин үөрдэ туруохтара! – диэбит ийэ.

Оттон уол биир сибэккини сөбүлээбит, иккиһи буоллаҕына – суох. Уу кутаары туран сырыы аайы сөбүлүүр сибэккитин таптаан ымманыйар эбит: «Эн олус да кэрэҕин! Мин эйигин таптыыбын!» Оттон сөбүлээбэт сибэккитин көрдөҕүнэ, иһигэр мөҕүттэрэ: «Наһаа куһаҕаҥҥын. Таах уу кутабын. Түннүгүнэн быраҕыам этэ да, ийэм хомойуоҕа!»

Хас да ый ааспыт. Ийэтэ биирдэ өйдөөн көрбүтэ, биир иһит сибэккитэ үүнэр, улаатар, оттон иккиһэ хагдарыйан, кэхтэн иһэр эбит.

– Бу тоҕо? – диэн аймаммыт ийэтэ. – Уу куппатаҕыҥ буолаарай? – диэн уолуттан ыйыппыт.

– Куппутум, син биир анараа сибэккигэ курдук! – диэн хоруйдаабыт уола.

Ийэтэ хагдарыйбыт сибэккилээх иһити ылан, бэйэтин хоһугар илдьэн уурбут.

– Мин эйигин эмтиэҕим, барахсаны! – диэбит сибэккигэ сымнаҕастык.

Итиэннэ сырыы аайы уу кутарыгар сибэкки улаатарын, сибэккилээн силигилиирин, дьикти үчүгэй сыты таһаарарын хараҕар оҥорон көрөрө.

Чахчы оннук буолбута.

– Дьиктитин! – диэн үөрбүт ийэ.

Уол эмиэ соһуйбут: өлө сыспыт сибэкки эмискэ тиллэн кэлбит. Итиэннэ олус кэрэ дьүһүннэммит. 

– Ийээ, тугу гыммыккыный?

– Билбэппин! – диэн хоруйдаабыт кини.

Ол тиллии кистэлэҥин буордаах иһит уонна сибэкки бэйэтэ эрэ билэн эрдэхтэрэ. Ол эрээри кинилэр ону сатаан кэпсиир кыахтара суоҕа.

Притчи.ру саайтан Айыына Ксенофонтова көҥүл тылбааһа