Сибэкки сакаастыыртан сэрэниҥ, албыҥҥа түбэһиэххитин сөп

Ол курдук, түөкүттэр босхо биллэрии порталларыгар удамыр сыанаҕа сибэкки дьөрбөтүн атыытын туһунан угуйуктары таһаараллар. Сибэкки атыылыыр маҕаһыыннар бэрэстэбиитэллэрэ буолан, эрдэттэн төлөбүр көрдүүллэр. Итиэннэ харчыны ылан баран, сибээскэ тахсыбат буолан хаалаллар.

Маннык албыҥҥа Дьокуускай олохтооҕо дьахтар хайыы үйэ түбэстэ. Кини кэллиэгэлэригэр сибэкки сакаастаабыт уонна 49 000 солкуобайыттан маппыт.

Өссө биир арыый атын схема баар: курьер сакааһы тиэрдэр, онтон сарсыныгар сакаастаабыт киһиэхэ тиэрдии сулууспатын үлэһитэбин дэнэр киһи төлөпүөннүүр уонна букет ылбыккын бигэргэтэр кодун ыйытар. Дьиҥэр, түөкүттэргэ бу код үп-харчы эпэрээссийэтин бигэргэтэргэ наада.

Өрөспүүбүлүкэ олохтоохторун интэриниэтинэн табаары сакаастыырга сэрэхтээх буолалларыгар уонна билбэт дьоҥҥо смс-иһитиннэриилэртэн кодтары хаһан да үллэстимэҥ диэн ыҥыраллар.