«Шаурмалара таах-сибиэ. Том-ямнарын, «Пятерочка» сыаната ыарахан...»

Интэриниэт кэпсииринэн, блогер бэйэтин «В диких условиях» диэн бырайыагын чэрчитинэн Арассыыйа, Азия дойдуларынан сылдьан норуоттар култуураларын билсэр эбит. Онтун аҕыйах сурутааччытыгар тута кэпсии сылдьар.

Арай Саха сиригэр, чуолаан Дьокуускайга үктэммитин туһунан видеотун эмискэ 64 тыһыынча (!) киһи сэргээн, блогер интэриниэт куйаарыгар эмискэ өрө күөрэс гыммыт. Ол кэлэн атын ханна да буолбатах, Култуура уонна сынньалаҥ пааркатыгар хоноору, түүн -7 кыраадыс тымныыттан тоҥон уһуктубут.

Күнүс «ыалдьыппыт» паарка ойууругар балааккатын кистээн баран, куораты көрө барбыт. «Пятерочка» сыаната Арассыыйа атын куораттарынааҕы ыараханын, шаурмабыт мөлтөҕүн, том-ям сыаната 819 солк. (!) соһуйбутун үллэстэр.

Манна даҕатан, Дьокуускайга ыарахан уйуктаах массыыналаах суоппардарга олорсон кэлбит. Итиэннэ паромҥа харчы хомуйар эрээри, суол мөлтөҕүн, тупсарыы үлэтин туһунан толкуйдаабаттарын сэмэлиир

«Киин куорат» Дьокуускайдааҕы култуура уонна сынньалаҥ пааркатын салалтатыттан бу түгэн туһунан ыйыталаста.

– Бу түгэни эһигиттэн иһиттибит. Пааркаҕа суукканы эргиччи үлэлиир харабыллар бааллар эрээри, күнүс киирэн баран саспыт киһини булар уустук. Тоҕо диэтэххэ паарка 110 гектар кэриҥэ сиринэн тайаан сытар, ол иһигэр аттракционнар, сынньалаҥ зоналара баара суоҕа 4 гектары ылаллар. Онон, санаан да көрдөххө, от-мас быыһыгар бүкпүт киһини булар судургута суох сорук. Инники өттүгэр баҕар биир эмэ киһи эмиэ итинник хонон ааспыта буолуо эрээри, ким даҕаны кини курдук киһиргээн кэпсээбитэ биллибэт.

Санатар буоллахха, «түүҥҥү хоноһобут» салгыы Магаданынан Тайланд диэки барар былааннаах.